Al forým jumysyn elimizdiń týrıstik oń ımıdjin qalyptastyrý jáne týrıstik ınfraqurylymdy damytý maqsatynda eńbek etip kele jatqan «Qazaqstan týrıstik assosıasııasy» uıymy uıymdastyrdy.
Forým jumysyna Qytaı, Koreıa, Malaızııa, Germanııa, Reseı, Qyrǵyzstan, О́zbekstan, Mońǵolııa jáne Tájikstan elderinen týrızm salasyna qatysy bar bıznes qurylymdarynyń ókilderi, sondaı-aq Mádenıet jáne sport mınıstrliginen, oblys ákimdikterinen, sol sııaqty atalǵan salaǵa qatysy bar memlekettik jáne úkimettik emes uıymdar ókilderi de qatysty.
Forýmnyń alǵashqy kúni «Qazaqstan Respýblıkasynda týrızmniń jáne qonaq úı naryǵynyń damýynyń qazirgi kezdegi jaǵdaıy men perspektıvasy» taqyrybynda jáne Jambyl oblysynyń týrızmi men qonaq úılerdiń damýy taqyryby tóńireginde dıskýssııalar men tusaýkeserler ótkizildi. Munda Taraz týrızmin damytý máselesi kóterilip, tarıhı ólkeniń búgingi tynys-tirshiligine barlaý jasaldy. Sondaı-aq kelesi kúni «Balasaǵun» ortalyq konsert zalynda qolóner sheberleriniń kórmesi, forým qatysýshylaryna arnalǵan aqparattyq týr jáne «Ekologııalyq týrızmdi damytý standarttary men prınsıpteri» taqyryptarynda sheberlik synyptary uıymdastyryldy. Forým jumysyna qatysýshylar Taraz topyraǵynan tabylǵan kóne jádigerlerdi tamashalap, ult tarıhynyń shejiresine qanyqty.
Budan keıin buqaralyq aqparat quraldarynyń ókilderine arnalǵan konferensııa ótip, konferensııa barysynda oblys ákimi Kárim Kókirekbaev forýmǵa qatysýshylardy jambyldyqtar atynan quttyqtady. Ákim óz sózinde Jambyl jeriniń tereń tarıhyna toqtalyp, Elbasynyń «Bolashaqqa baǵdar; rýhanı jańǵyrý» baǵdarlamalyq maqalasy boıynsha oblysta atqarylyp jatqan jumystardy da áńgimeledi. О́z kezeginde «Atameken» ulttyq kásipkerler palatasy tóraǵasynyń orynbasary Iýlııa Iаkýpbaeva jáne Qytaı Halyq Respýblıkasy Týrızm akademııasynyń prezıdenti Daı Bın sóz alyp, jalpy álemdik týrızm salasy týraly áńgimeleı kele, Jambyl jeriniń týrızmin damytý týraly da oılaryn ortaǵa saldy.
Jalpy, Jambyl óńiri elimizdegi tarıhı mekenderdiń birinen sanalady. Kóne zamandardan beri jalǵasyp kele jatqan jádigerler kóshi, ult tarıhynda aıtýly oryn alatyn keshender de osy Áýlıeata óńirinde ornalasqan. Sol sebepti óńir týrızmin damytý búgingi kúni asa mańyzdy máselelerdiń biri. Osy oraıda, forým aıasynda qazaqstandyq jáne Qytaı týroperatorlaryna arnalǵan aqparattyq týr, Mádenıet jáne sport mınıstrligimen uıymdastyrylyp otyrǵan «Qazaqstannyń Uly Jibek joly boıynsha saıahat» taqyrybynda halyqaralyq festıval, qolónershiler kórmesi, sonymen qatar qolóner sheberleri, mektep oqýshylary jáne kıim tigýmen aınalysatyn oblys turǵyndarynyń qatysýymen «TARAZ FASHION DAY» baıqaýy ótti. Baıqaý barysynda úzdik shyqqan úmitkerlerge «Úzdik sýret», «Úzdik kolleksııa» jáne «Úzdik qolóner sheberi» atalymdary tabystaldy. Al qolónershiler kórmesine kelgen qonaqtar oblys qolóner sheberleriniń kádesyı ónimderin, zergerlik buıymdardy jáne teriden, qyshtan jasalǵan qolóner buıymdaryn tamashalady. Sol sııaqty О́zbekstan jáne Qyrǵyzstan elderiniń úzdik dızaınerleri de óz kıim kolleksııalaryn kópshilik nazaryna usyndy. Sondaı-aq sheteldik meımandar úshin Qarahan, Aısha bıbi, Aqyrtas tarıhı keshenderine de saıahattar uıymdastyrylyp, forým qatysýshylary men jergilikti týroperatorlar arasynda V2V formatynda tájirıbe almasý maqsatynda kezdesýler uıymdastyryldy.
Áýlıeata óńiriniń týrıstik áleýetin arttyrýǵa baǵyttalǵan forým barysynda qazaqstandyq jáne sheteldik qonaqtar úshin oblystyń týrıstik áleýeti týraly mol maǵlumattar berildi. Jambyl jerindegi tarıhı keshenderdi úsh kún boıy tamashalap, tarıhyna úńilgen sheteldikter óńirdegi tarıhı-mádenı nysandarǵa qyzyǵýshylyq tanytyp, joǵary pikir bildirdi.
Hamıt ESAMAN,
«Egemen Qazaqstan»
Jambyl oblysy
