Ol osydan eki jyl buryn tapsyrylǵan bolatyn. Kólemi – 2763 sharshy metr, qurylysyna bıýdjetten 788 mıllıon teńge qarajat jumsaldy. Jańa tıpti sport ǵımaratynda úsh jabyq, úsh ashyq tennıs korty bar. О́tken jyldan beri onyń ashyq jáne jabyq korttarynda birneshe ret respýblıkalyq týrnırler ótti.
Elbasy keledi degennen sport mektebiniń dırektory Lıýdmıla Okýneva bastaǵan ujymnyń, tennıs ortalyǵyndaǵy jattyqtyrýshylardyń, jas sportshylardyń kóńili erekshe alaburtty. Jattyǵý sabaqtary da asa bir qyzyǵýshylyqpen ótti. Balalar men jasóspirimder sport mektebindegi úzdik sportshylardyń biri 13 jasar tennısshi Ekaterına Sıtnıkova da bul habarǵa qatty qýanǵan.
Ákesiniń aǵasy, áýletindegi bar bala «ata» dep ataıtyn Gennadıı Vedıaev Katıanyń alty jasynda qolynan jetektep, tennıs sportyna aparǵan. Dáriger Gennadıı Petrovıchtiń ózi de sportshy, jetpisten assa da súıikti mamandyǵy dárigerlikti de, súıikti isi voleıboldy da tastaǵan joq. Tennıs kishkentaı Katıaǵa da erekshe unap, alty jyldan beri sport mektebiniń úzdik oqýshysyna aınaldy. Mektepte de belsendi, jaqsy oqıdy.
Sıtnıkova Nursultan Nazarbaevty teledıdardan ǵana kórgen. Elbasymen jaqyn turyp sóılesý, qolyn alý onyń bala qııalynyń jaı ertegisi sııaqtanatyn. Tennıs kortyna kirisimen Nursultan Ábishuly aınalaǵa rızashylyqpen qarady. At shaptyrym, jaryq, bıik kort. Ol ózin kútip turǵan sport mektebiniń úrkerdeı úzdik tennısshilerine jaqyndady.
– Qostanaı tennıstiń jabyq kortyna zárý bolatyn. Bul óńirdiń qysy uzaq, qatal, jazy qysqa. Munda buryn qys mezgilinde jattyǵý úshin eshteńe bolmaıtyn. Mine, senderde endi tennıs korty, kúshtilik sport túrleriniń akademııasy, jabyq muz aıdyny, fýtbol stadıony – bári bar. Qysta da jattyǵýlar úzilmeıdi. Sport – keremet is, onymen bala kezden aınalysyńdar, sonda ómir boıy densaýlyqtaryń jaqsy bolady, sporttan qol úzbeıtin bolasyńdar, – dedi Nursultan Ábishuly. Elbasy sózin aıaqtaǵanda balalardyń aldyńǵy jaǵynda turǵan Ekaterına Sıtnıkova Nursultan Ábishulynyń kelgenine balalardyń barlyǵy óte qýanyshty ekenin jáne óziniń sporttaǵy jetistikterin aıtyp berdi.
– Men 2016 jyly respýblıkalyq týrnırde úshinshi oryn, bıylǵy ótken respýblıkalyq eki týrnırde de ekinshi oryndy ıelendim. Tennısti óte jaqsy kóremin.О́skende elimizdiń namysyn qorǵaıtyn bolamyn, álemdik jarystarda Qazaqstannyń týyn jelbiretýdi armandaımyn jáne soǵan qol jetkizemin, – dedi Katıa. Armany asqaq náp-názik qyzdy Elbasy óz perzentindeı meıirlene baýyryna qysty.
Elbasy balalarǵa óziniń de tennıspen aınalysqanyn aıtty. Elbasynyń: «Men de tennıspen aınalystym. Densaýlyǵy myqty jáne bilimdi adam ǵana ómirde jetistikterge qol jetkizedi. Sondyqtan jastar sportpen aınalysýy, dostasýy kerek. Sende de dostaryńa sportty serik etý kerektigin aıtyńdar», degen sózi balalardyń kókeıinde jattalyp qalatyny kúmánsiz.
Sol kúni Elbasynyń Tennıs kortyna barǵanyn, balalarmen arada bolǵan áńgimesin, onyń aldynda Katıanyń jáne jas tennısshiler Sanjar Buqanovtyń, Dıana Sháripovanyń sóılegenin sońǵy jańalyqtardan kórsetti.
– Qýanǵannan jylaı berippin. Qyzymnyń ustazdary, jattyqtyrýshylary, týystar, dos-jarandar telefon tutqasyn qoıdyrmady, quttyqtap jatyr. Tipti Reseıdegi týystarymyz ben tanystarymyz kórip, telefon shaldy ǵoı, – deıdi Katıanyń anasy Elena. Sıtnıkovter Elbasynyń jas tennısshilermen suhbattasyp turǵan jáne Katıany baýyryna tartqan sáti beınelengen sýretterdi úlkeıtip, ramkaǵa salyp, tórine ilip te úlgerdi.
Mundaı sýretter Tennıs ortalyǵyna da ilinipti. Jattyǵýǵa kelgen sportshylar men tennıs áýesqoıshylary oǵan qaraǵan saıyn Qostanaı tennısiniń jarqyn bolashaǵy sáýle shashqandaı bolady.
Názıra JÁRIMBET,
«Egemen Qazaqstan»
QOSTANAI
