Partııanyń Respýblıkalyq qoǵamdyq qabyldaý bólmesi ekinshi ret uıymdastyryp otyrǵan aksııaǵa kóshi-qon saıasaty boıynsha jumystardy júzege asyryp otyrǵan atqarýshy organdardyń ókili qatysty jáne elimizdegi barlyq oblystar men Astana, Almaty qalasyndaǵy kóshi-qon polısııasynyń qurylymdyq bólimsheleriniń mamandary beıne baılanysqa shyqty.
Bul shara atqarýshy bıliktiń nazaryn kóshi-qon saıasatyna nazaryn aýdarý, «Halyqtyń kóshi-qony týraly» zańy men ózge de qaýlylardyń óz deńgeıinde atqarylýyn qamtamasyz etý, sondaı-aq azamattardyń kún tártibinde sheshilmeı turǵan máselelerin anyqtap ony zań aıasynda sheshýge yqpal etý maqsatynda ótip otyr. Elbasynyń Dúnıejúzi qazaqtarynyń V quryltaıynda bergen tapsyrmalaryn júzege asyrý jumystary da baıandalǵan jıynda quzyrly organ ókilderi kóshi-qon máseleleri boıynsha azamattardy taqyryptyq qabyldaý ótkizdi.
Jıynda oralmandar máselesin sheshýge atsalysyp kele jatqan qoǵamdyq uıym basshylary atqarýshy bılik ókilderinen osy másele tóńiregindegi suraqtaryna tikeleı jaýap aldy jáne usynystaryn jetkizdi.
Atap aıtqanda qoǵamdyq uıymdar tarapynan QR Ákimshilik quqyq buzýshylyq týraly zańnamany bir ret buzǵan qandastarymyzdyń «Halyqtyń kóshi-qony týraly» zańyna saı, turaqty tirkeýge turýǵa múmkindigi bola turyp, sotqa tartylýy jáne turaqty tirkeýge turýdan bir jylǵa shettetilýi, bilim alý maqsatynda kelip, grantpen oqýǵa túsken ulty qazaq stýdentterdiń joǵary oqý oryndarynyń jataqhanasyna zań aıasynda turaqty tirkeýge turýǵa múmkindigi bola turyp, turaqty tirkeýge tura almaýy, syrtta júrgen qandastarymyzǵa ózderi turǵan elderdegi Qazaqstan mekemeleri arqyly QR Úkimeti aıqyndaǵan óńirlerge kelýge, oralmandardy qabyldaýdyń óńirlik kvotasyna enýge bolatyny týraly Syrtqy ister mınıstrliginen jetkilikti aqparat bermeýi sııaqty máseleler ortaǵa qoıyldy. Mınıstrlik ókilderi jaýap qaıtardy jáne zań aıasynda sheshý joldaryn qarstyrýǵa ýáde berdi.
Saýaldarǵa saı Ishki ister mınıstrligi Kóshi-qon qyzmeti komıteti tóraǵasynyń orynbasary Yrysbek Isaev elimizde kóshi-qon máselelerimen aınalysatyn Halyqqa qyzmet kórsetý ortalyǵy jyldyń aıaǵyna deıin Astanada qurylatynyn jáne kelesi jyly bundaı ortalyq barlyq oblystarda ashylatynyn aıtty. Sondaı-aq ol 2018 jyldyń 1 shildesinen bastap elimizge vızamen keletin shetel azamattary shekaradan ótken kezde birden ýaqytsha tirkeýge múmkindik alatynyn jetkizdi.
