Saltanatty sharaǵa Memlekettik hatshy Gúlshara Ábdiqalyqova, Din isteri jáne azamattyq qoǵam mınıstri Nurlan Ermekbaev jáne memlekettik mekemelerdiń, sarapshylar qaýymdastyǵy men ÚEU uıymdardyń ókilderi qatysty.
Rásimniń ashylý saltanatynda sóz sóılegen G.Ábdiqalyqova áleýmettik máselelerdi sheshýge eleýli úles qosyp júrgen úkimettik emes uıymdarǵa syıaqy taǵaıyndaý «Rýhanı jańǵyrý» baǵdarlamasy aıasynda uıymdastyrylǵanyn atap ótti.
«Elbasy Nursultan Nazarbaev azamattyq qoǵam, onyń ishinde úkimettik emes uıymdar demokratııanyń ajyramas bóligi dep aıtyp ótken bolatyn. Memleketimizdiń ósip-órkendeýi men qoǵamdyq sananyń jańǵyrý azamattar belsendiliginiń artýy arqyly júzege asatyny anyq», dedi G.Ábdiqalyqova.
Memlekettik hatshy qoǵamnyń sanasyn jańǵyrtý áleýmettiń belsendiligi, azamattardyń qazirgi zaman ben bolashaq aldyndaǵy jaýapkershiligi bolmasa júzege aspaıtynyn jetkizdi. Onyń aıtýynsha, úkimettik emes uıymdardyń jumysyn jandandyrý jáne ony qoldaý osy baǵytta atqarylatyn mańyzdy sharalar qatarynda.
G.Ábdiqalyqova Qazaqstandaǵy ÚEU qyzmetiniń tarıhyna kóz júgirtip, elimizde tuńǵysh qurylǵan úkimettik emes uıym retinde «Semeı-Nevada» qozǵalysyn atap kórsetti. Táýelsizdik jyldarynan beri elimizde olardyń qyzmeti qarqyn aldy. Sonyń nátıjesinde, qazirgi tańda Qazaqstanda 19 myńnan astam ÚEU tirkelip, onda 30 myńǵa jýyq adam jumys isteıdi. Memlekettik hatshynyń sózine súıensek, úkimettik emes uıymdar Astana, Almaty qalalarynda jáne OQO-da belsene qyzmet atqarady.
Memlekettik hatshy ÚEU-darǵa bólingen qarajat pen olardyń atqarǵan jumystarynyń esebine toqtaldy. Sondaı-aq, eldiń damýyna úles qosyp júrgen birqatar úkimettik emes uıymdardyń qyzmetin joǵary baǵalady.
«Osy syıaqy – ÚEU-dardyń qyzmetin memlekettiń baǵalaýy. Olardyń mańyzdy áleýmettik máselelerdi sheshýge qosqan úlesi mol. Solardyń keıbirin atap ótýdi jón kórip otyrmyn. Máselen, Almatyda Serikqazy Kákibalanulynyń bastamasymen qurylǵan «Qazaq ınterneti» qoǵamdyq qory 2005 jyldan beri qazaq ınternetin damytýǵa eleýli úles qosyp, bes júzden astam ınternet resýrs jasady. Qor jasaǵan resýrstar ishinde «Egemen Qazaqstan», «Ana tili», «Qazaq ádebıeti» sekildi saıttar bar», dedi G.Ábdiqalyqova.
Din isteri jáne azamattyq qoǵam mınıstri N. Ermekbaev óz kezeginde úkimettik emes uıymdardyń elimizde atqaryp jatqan mańyzdy róline toqtaldy. Onyń aıtýynsha, áleýmettik mańyzdy máselelerdiń oń sheshimin tabý barysynda ÚEU-lar memlekettiń taptyrmas serigine, senimdi áriptesine aınalyp otyr.
«Úkimetti emes uıymdar Elbasynyń alǵa qoıǵan maqsattaryna qol jetkizýge, elimizdiń damýyna eleýli úles qosady. Memleket túrli tásilder arqyly olarǵa qoldaý kórsetip keledi. Osy qoldaýdyń qatarynda memlekettiń áleýmettik tapsyrys granttary jáne búgin beriletin syıaqy bar. Munyń bári – azamattyq qoǵamnyń jáne demokratııalyq saıasattyń belgisi», dedi N.Ermekbaev.
Baıqaýǵa 2016 ótinish kelip túsken. Arnaıy qurylǵan sarapshylar toby solardyń ishinen 15 atalym boıynsha 59 úkimettik emes uıymdy úzdik dep taýypty. Júldegerlerge 4,5 mıllıon teńge kólemindegi syıaqy taǵaıyndalǵan. Úzdikter qatarynda «Qazaqstan KVN odaǵy» respýblıkalyq jastar qoǵamdyq birlestigi, «Ardager» qoǵamdyq birlestigi, «Bolashaq» halyqaralyq stıpendııasy stıpendıattarynyń qaýymdastyǵy» sekildi beldi uıymdar bar.
Júldegerlerdiń biri «Qazaqstan KVN odaǵy» respýblıkalyq jastar qoǵamdyq birlestigi prezıdenti Esen Eleýken paıymdaýynsha, mundaı syıaqylar úkimettik emes uıymdardy odan ári belsene jumys isteýge yntalandyrady.
«Jastar saıasaty atalymy boıynsha júldege ıe boldyq. Aldaǵy ýaqytta úkimettik emes uıymdarǵa qoldaý jalǵasyn taba berýine tilektespiz. Mundaı baıqaýlar ıgi ister atqaryp jatqan uıymdarǵa kómek ári qoldaý», dedi E.Eleýken.
О́tinimderdiń basym bóligi halyqtyń áleýmettik osal toptaryn, jastar men balalardyń bastamalaryn, azamattar men uıymdardyń quqyqtaryn jáne zańdy múddelerin, qoǵamdyq kelisim men ulttyq birlikti nyǵaıtý sekildi baǵyttar boıynsha kelip túsken.
