Birden jolyǵýdyń sáti túspedi. Biraq ózimen júzdeskenshe jolaı kezdesken adamdar arqyly Atymtaı jomart jigit aǵasynyń aýyl ıgiligi jolynda atqarǵan jumystaryna qanyǵyp, birshama tanı, bile túskendeı bolǵanbyz.
«Ol kisi osyndaǵy 1996 jyly qurylǵan «Iýbıleınyı» JShS-in birneshe jyldan beri basqaryp keledi. Mektepti osy aýyldan bitirgen. Sodan beri osy jerde. Týǵan aýylynan kindigin úzgen emes. 2008 jyly aýylǵa meshit salyp berdi, kelesi jyly qatymhana ashty. 2010 jyly óz qarjysyna sport modýlin turǵyzyp, aýyldastaryna syıǵa tartty. Aýylda kóp jyldan beri qaraýsyz qalyp, qańyrap turǵan Mádenıet úıin 24 mıllıon teńgege kúrdeli jóndeýden ótkizip, 2014 jyly qaıtarymsyz túrde memlekettiń qaramaǵyna berdi. Osynyń arqasynda eldi mekendegi 10-ǵa jýyq adam jumyspen qamtyldy. Kásipker aýyldaǵy ólim-jitim, toı-tomalaq kezinde de kómektesip turady. Basqa jaqtan kóship kelgen, jaǵdaıy tómen jumysshylarǵa, jas mamandarǵa úı satyp alyp beredi. Kelesi jyly jumysshylaryna arnap 2 páterli úı salýdy josparlap otyr. Qazir sút fermasyn salyp jatyr. Jaqynda ashylsa, talaı kisige jumys tabylady», degen bizdi eldi meken syrtynda qarsy alǵan Kóldeneń aýyldyq okrýginiń ákimi Saılaýhan Istemesov.
Ekeýara áńgimeden ańǵarǵanymyz, búginde aýyldastarynyń arqasúıerine aınalǵan Mamyrbek Qarashev barlyq baspaldaqtan ótip, ómirdiń ystyq-sýyǵyn az tatpaǵan sekildi. Segiz jyl kombaınnyń qulaǵyn ustapty, 10 jyl mal baǵypty, uzyn yrǵasy 31 jyl qarapaıym jumysshy bolyp ter tógipti. 1994 jyly kombaın júrgizýden Qazaqstannyń chempıony atanypty. Sodan da bolar aýyldastarynyń eshqaısysy qýlyǵyn asyra almaıdy eken. Bul kisi syrtynan bir qarap ketip bara jatqan maldyń ishinde qaısysy aýyryp turǵanyn, qaısysy aqsaq, qaısysy toqsaq ekenin, júrip bara jatqan kóliktiń qandaı aqaýy baryna deıin bilip qoıatyn kórinedi. Birde mynadaı qyzyq bolypty. Arbaǵa shúmshıtip shóp tıep alǵan aýyldyń bir jigiti oıynda eshteńe joq, aǵamyzdyń aldynan shyqpaı ma? Arbany toqtatqan keıipkerimiz «baıaǵyda jas shaǵymyzda osylaı shóp tıep, astyna jem salyp alýshy edik» dep ázildep, sol jerde aýyldasynyń «qylmysyn» áshkerelep tastapty.
Izdegen adamymyzdy jumys basynan keziktirdik. Qarapaıym eken, iske myǵym bolǵanymen, sózge sarań sekildi kórindi. «Aýylyńyzǵa osyndaı is jasapsyz, áıtipsiz, búıtipsiz» dep bastap kele jatyr ek: «Munyń bári halyqqa, elge qajet dúnıe ǵoı. Aýylǵa kómektespegende qaıda kómektesemiz? Búgingi jetkenimiz, asyp-tasyp júrgenimiz – osy aýyldyń arqasy. Osynda alǵan bilimniń arqasy. Perzenttik paryz degen bolady. Sony eshqaısymyz umytpaýǵa tıispiz. Osy aýylda týyp-óstik. Er jettik. Boq dúnıeni ózimizben birge arqalap ketpeımiz ǵoı. Jasap jatqan isterimiz erteńgi urpaqqa úlgi-ónege bolsa, keıingi býyn osyny jalǵastyrsa deımiz», dep qysqa qaıyrdy.
Temeki tartar mezettegi áńgime barysynan túıgenimiz, kásipker basqaratyn «Iýbıleınyı» JShS mal jáne egin sharýashylyǵymen shuǵyldanady. О́zderiniń naýbaıhanasy da bar. Halyq nandy osy jerden senesiz be, senbeısiz be, 50 teńgege satyp alady. Kóldeneń aýylynyń 114 turǵyny eńbek etetin mekemege agronom, zootehnık, ınjener, mal dárigeri sekildi mamandar qajet eken. M.Qarashev jaqynda aýyldaǵy mektepke baryp, osy mamandyqtardy ıgergisi keletin oqýshylardy ýnıversıtette tegin oqytyp, keıin jumysqa alyp, baspanamen qamtýǵa ázir ekenin aıtypty.
Aýylǵa ádeıilep kelip turǵannan keıin kásipker saldyrǵan sport modýlin de tamashaladyq. Ishi qyz-qyz qaınap tur. Bir buryshta balǵyn boksshylar, bir shette jas balýandar, ortada voleıbol oınaǵan boıjetkender. Keıipkerimiz arnaıy shaqyryp, baspana alyp bergen Qanatjan Dúısenbaev bes jyldan beri osynda bokstan bapkerlik qyzmet atqaryp jatyr eken. Shákirtteriniń aldy aýdan, oblysty qoıyp, respýblıkany baǵyndyryp úlgeripti. Qazir О́skemendegi daryndy balalarǵa arnalǵan mektep-ınternatynda oqıtyn shákirti Ernur Symashev jaqynda Kókshetaýda ótken respýblıkalyq týrnırde top jarypty. «Alty balamyz qazir sport mektebinde oqyp jatyr. Tórteýi – О́skemende, ekeýi Taldyqorǵanda. Bul jerden áli talaı chempıondar shyǵady dep oılaımyn», deıdi bapker.
Kóldeneńde bokstan bólek shańǵy, voleıbol, qazaqsha kúres pen jeńil atletıka da jaqsy damyǵan. Aýyldyń voleıbolshy qyzdary aýdanda qarsylas shaq keltirmeı, oblysta júldeger atanyp júr. Osy modýlde jattyqqan Móldir Bısenova voleıboldan jasóspirimder arasynda ótken el chempıonatynda úshinshi oryndy ıelenipti. Qary qalyń bolsa da, qysy jaıly aýyldyń taǵy bir túlegi Jánibek Sadyqov qazir Poltoranın sekildi áıgili shańǵyshylardyń qalasy Rıdderde sheberligin shyńdap jatqan kórinedi.
Modýlden shyǵa beristegi aýlada eldi mekenniń 76 jastaǵy turǵyny Qaınysh Malshybaevamen az sóılesip, aýyl týraly suradyq. «Bul jerdiń bári buryn qalyń toǵaı bolatyn. Kelip otyn alatynbyz. Qazir mine, qandaı ǵajap! Jaınap tur. Aýylymyz jaqsy damyp jatyr, táýbe. Azamattar aman bolsyn», dedi kópti kórgen qarııa.
Azamat QASYM,
«Egemen Qazaqstan»
Shyǵys Qazaqstan oblysy,
Úrjar aýdany
