Salamatty ómir saltyn ustanatyn qala jurtshylyǵy men qonaqtary onda qalaǵan ýaqytynda tegin syrǵanaq teýip sergı alady.
Shaǵyn muz alańqaıy jeltoqsan aıynyń alǵashqy kúninen bastap iske qosylady. Syrǵanaý alańdarynyń barlyǵy zamanaýı standarttarǵa saı jańa tehnologııalardyń kómegimen jasalyp jatyr. Qala jurtshylyǵyna qýanysh syılaǵan áleýmettik jobany júzege asyrýǵa qala ákimdigi muryndyq bolǵan. Mamandar jańa syrǵanaý alańqaılary Almatynyń myń qubylǵan aýa-raıyna oraılastyrylyp jasalǵanyn aıtady.
– Bul muz alańdary kún raıy qalaı bolǵanyna qaramastan, tipti 10 gradýs jyly bolsa da erimeı qatyp tura beredi. Iаǵnı, alańdardyń arnaýly tońazytqysh quraly muzdy eritpeýge qolaıly temperatýrany qamtamasyz ete alady. Aýa raıyna qaraı temperatýralyq rejım júıesin ornatamyz. Demalýshylarǵa kez-kelgen ýaqytta kelýge yńǵaıly bolý úshin barlyq jaǵdaı jasalady – deıdi qurylys kompanııasynyń basshysy Muhammedjan О́ser.
Qalanyń birneshe aýmaǵynda ashyq muz alańdaryn qurý jumystary qarqyndy júrip jatyr. Joǵaryda aıtqanymyzdaı táýlik boıy jumys isteıtin syrǵanaý alańdary barlyq kelýshiler úshin aqysyz. Tek, demalýshylar ózimen birge konkılerin ala kelýi tıis. Sondaı-aq syrǵanaý alańdarynyń mańynda tamaqtanýǵa arnalǵan arnaýly oryndar men konkılerdi jalǵa berý ortalyqtary jumys isteıtin bolady. Uıymdastyrýshylar olardyń baǵalary buqara halyqqa qol jetimdi bolýy árdaıym qadaǵalanyp otyratynyn aıtady.
Sport basqarmasynyń mamandary bergen málimetke súıensek aýmaǵy 850 sharshy metrdi quraıtyn sý jańa syrǵanaý alańy qaladaǵy Tuńǵysh Prezıdent saıabaǵynda, sonymen qatar shahardaǵy Jibek joly-Abylaı han, Jandosov-Shaımerdenova, Ál Farabı-Remızovka kósheleriniń qıylysynda jáne Jetisý aýdany ákimdiginiń mańynda sondaı-aq, «Mart» saýda ortalyǵynyń janynda salynyp jatyr. «Sporttyq Almaty» baǵdarlamasynyń aıasynda qolǵa alynyp otyrǵan ıgi bastama sport súıer Almatylyqtar úshin bıylǵy qystyń basty jańalyqtarynyń biri bolmaq.
Arman OKTIаBR,
«Egemen Qazaqstan»
ALMATY
