Portaldyń habarlaýynsha, Android bazasyndaǵy telefondar jaqyn jerdegi mobıldi baılanys stansalar týraly aqparattardy jınap, ony Google kompanııasyna bergen. Bul málimetter smartfon ıesiniń naqty meken-jaıyn kórsetip bere alady. Atalǵan problema Google Play Services qosymshasyn iske qosqan telefondarda baıqalǵan.
Jeke málimetterdiń qupııa saqtalýyn qoldaıtyn belsendiler Google "óz tutynýshylaryn satyp ketti" dep málimdedi.
Google Quartz saıty jarııalaǵan aqparatqa jaýap berip, kompanııa serverlerinde tutynýshylardyń meken-jaıy týraly aqparat saqtalmaǵanyn, geolokasııalyq málimetterdi joldaýdy toqtatý úshin Android júıesine ózgerister engizetinin aıtty.
Google 11 aı boıy stansalardyń meken-jaılaryn habarlama jiberý jyldamdyqǵy men sapany arttyrý úshin jınaǵan. Kompanııanyń aıtýynsha, jınalǵan aqparat birden óshirilip otyrǵan.
Internettegi tutynýshylar quqyǵyn qorǵaýmen aınalysatyn Privacy International uıymy adamdar qoldaryndaǵy smartfondardyń ne istep jatqandaryn bilmeıtinin aıtty. "Biz smartfon satyp alǵanda, mundaı satqyndyqty kútpeımiz. Google bul áreketterin toqtatamyz dep aıtqanymen, onyń bizge aıtpaı taǵy ne istep jatqanynan biz beıhabarmyz", deıdi uıymnyń zańgerleri.
