Sol kezdesýden keıin Stanımır Stoılov shákirtteri óz alańynda 17 oıyn qatarynan eshkimge ese jibermeı keledi. Tipti, aýzyn aıǵa bilegen Madrıdtiń «Atletıkosy» «Astana-Arenada» bir upaıdy qanaǵat etti. Túriktiń «Galatasaraıyn» təýbesine keltire jazdaǵan edi. Jurt maqtaǵan «Benfıka» tipti teń oıynǵa máz bolyp ketti. Grekııanyń «Olımpıakos», Kıprdiń APOEL sııaqty ortańqol komandalardy aıtpaǵanda, Shotlandııanyń «Seltıgin» de san soqtyrǵanbyz. Qysqasy, «Astana» óz alańynda utylý degendi úsh jyl buryn umytqan komanda.
Biraq, búgingi kezdesý burynǵylardan ózgerek. «Vılıarreal» Ispanııa fýtbolyndaǵy tańdaýly komandalardyń biri. Ujymdyq fýtboldyń keremet úlgisin kórsetip júrgen komandalardyń biregeıi. Ishki birinshilikte ońaılyqpen eshkimge upaı ustatpaıdy. La lıgadaǵy sońǵy úsh oıynda utylmaǵan. Týrnır kestesinde altynshy orynda tursa da alar asýy alda. Úzdik úshtikten kórinýge umtylyp júrgen, naqty maqsaty bar, myqty ujym.
Saıdyń tasyndaı saıypqyrandardan jasaqtalǵan «sary sýbmarınder» Sedrık Bakambý men Karlos Bakkaǵa senim artady. Keshe match aldyndaǵy baspasóz maslıhatynda muny bas bapker Haver Kaleha jasyrmaı aıtty. Ekeýi de oıynnyń taǵdyryn sheshe alatyn sheber shabýylshylar. Manýel Trıgorıstiń de orny erekshe. Ol az deseńiz, ortalyq alańda oıqastaıtyn Pablo Fornalsty qosyńyz. Italııa ulttyq quramasynyń oıynshysy Nıkola Sansone de alǵyrlardyń biri. Qorǵanysta Kabananga men Tvýmasıge tusaý salýǵa tyrysatyn Marıo Gaspar, Haýme Kosta, Rýben Semedý sııaqty tasqamal qorǵaýshylar bar.
Al biz Ivan Maevskıı men Serikjan Mujyqovtarǵa senim artamyz. Abzal Beısebekov te baryn salary anyq. Marın Tomasov ta tartynyp qalmas. Roman Murtazaevtan da úmit zor. Eń bastysy Djýnıor Kabananga men Patrık Tvýması bar bilgenderinen jańylmasyn.
Qos komanda úshin de kezdesýdiń nətıjesi mańyzdy. Qaı jeńgeni pleı-off kezeńine bir taban jaqyndaıdy. Stanımır Stoılov shəkirtterinen úmitimiz zor. Sebebi, «Astana» búgingi qazaq fýtbolynyń aınasy. Boıtumary. Búgingi «Astana» elimizdegi mıllıondaǵan jankúıerdi kók jəshikke telmirtetin jalǵyz qazaq komandasy. Jeńisti kúnder kóp bolsyn!
Erkebulan JOMART,
«Egemen Qazaqstan»
