Olımpıada úsh kezeńde ótip, birinshi kezeńge Zııatkerlik mektepterden 500-den astam oqýshy qatysty. Ekinshi kezeń respýblıkanyń barlyq óńirlerinde bir mezgilde onlaın rejıminde ótkizildi. Sondaı-aq, bul kezeńde esse jazdy. Al úshinshi kezeń, Temirtaý qalasynda ótti.
-Olımpıadanyń eki kúninde hımııa, bıologııa, matematıka, fızıka pánderi boıynsha tapsyrmalar berildi. Jarysta jeńýim meni úzbeı daıyndaǵan muǵalimderdiń arqasy. Bul jeńis solardyń jeńisi dep bilemin, - deıdi Jáńgir Mahmýtov.
Zııatkerler baıqaýyna akademık Muhtarbaı О́telbaev bastaǵan elimiziń beldi ýnıversıtettteriniń ustazdary tórelik etti.
Aıta keteıik, matematıka, fızıka, hımııa jáne bıologııa pánderi boıynsha ótetin prezıdenttik olımpıada, talantty jastardy anyqtaý jáne qoldaý baǵyttarynyń biri. Olımpıadanyń negizgi ıdeıasy - qazaqstandyq oqýshylardyń ǵylym jáne matematıka pánderine qyzyǵýshylyǵyn keńeıtý, olardy patrıotızm rýhynda tárbıeleý.
Sondaı-aq, Jáńgir Mahmýtov, 11-synyp oqýshysy Nurdaýlet Maralovpen birigip «Hello Tourist» jobasyn jasaqtaýda. Komanda Astanada ótken Ulttyq ınnovasııalyq tehnologııalar Olımpıadasyna qatysyp, jobalaryn usynyp ta kórdi.
-«Hello Tourist» jobasy - bul elimizdiń kórikti jerlerin týrısterge tanystyryp qana qoımaıdy. Sol jerge baratyn kólikterdiń, aımaqta bar tamaqtaný oryndary, uıyqtaıtyn jerler týraly aqparat, baılanys nómirleri kórsetilgen tegin mobıldi qosymsha jáne saıttan turady. Aqparatty jańartyp, únemi tolyqtyryp otyrýǵa jaǵdaı jasap jatyrmyz. «Qazaqstan 2050» qozǵalysynyń uıymdastyrýymen tuńǵysh ret ótken olımpıadaǵa baryp, jobamyzdy tanystyrdym, - deıdi Nurdaýlet Maralov.
Respýblıka boıynsha baıqaýǵa 200-den astam adam qatysýǵa nıet bildirgen. Tek sonyń 55-i ǵana iriktep alynyp, túrli synaqtardan ótti. Márege tek 10 oqýshy ǵana jetip Astanada óz jobalaryn qorǵady. Nátıjesinde Nurdaýlet Maralov pen Jáńgir Mahmýtov «ShAG» kompıýterlik akademııasynda bir jyl tegin oqýǵa sertıfıkat jeńip aldy.
Oqýshylar jobasyn áli de jalǵastyrmaq. Zııatkerlerdiń joba jetekshisi Azamat Týıtınniń sózinshe, bul elimizdiń kórikti de kórneki jerlerin damytýda aıtarlyqtaı úles qosady, delingen baspasóz habarlamasynda.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy
