Sotta anyqtalǵandaı, «Forte Laın» JShS-niń dırektory ýkraındyq B. men «Trast-Premer» JShS-niń dırektory T. 2014-2015 jyldary qasaqana, paıdaqorlyq nıetpen, bóten múlikti aldaý nemese senimdi teris paıdalaný jolymen, iri jáne asa iri kólemde paıda tabý maqsatynda, Aqtaý qalasy aýmaǵynda zańsyz ınvestısııalyq kompanııalar ashyp, arnaıy jarnamalar taratyp, qala turǵyndaryna jalǵan aqparattar berip, klıentterge yńǵaıly jáne qoljetimdi «Dom-35», «Dom-15», «Kopılka» baǵdarlamalary arqyly jalǵan ınvestısııalyq kelisim sharttar jasaqtap, iri mólsherde aqsha alyp otyrǵan.
Iаǵnı, sottalýshy B. 2015 jyldan bastap turǵyn úı alýǵa kómektesý maqsatynda ár jábirlenýshimen 1 mln teńgeden 9 mln teńgege deıin ár túrli kólemde jalǵan kelisim shart jasaqtap, qarjylaı shyǵyn keltirip otyrǵan. Al, T. óziniń zańsyz ashylǵan kompanııasy arqyly azamattarǵa qarajat salǵan jaǵdaıda az ýaqytta ústem aqymen aqshasyn qaıtaryp ala alatynyn aıtyp, senimine kirip, jalǵan ınvestısııalyq baǵdarlamaǵa qyzyqtyryp, 200 myń teńgeden bastap 4 mln teńgege deıin ár túrli kólemde jalǵan kelisim shart jasasyp, qarjylaı shyǵyn keltirip otyrǵan.
Sot úkimimen B. men T. Qazaqstan Respýblıkasynyń Qylmystyq Kodeksiniń 190-babynyń 4 bóliginiń 2-tarmaǵymen kináli dep tanylyp, zańsyz jolmen tabylǵan ne zańsyz jolmen tabylǵan qarajatqa satyp alynǵan múlikterin tárkileýmen, sáıkesinshe, 6 jylǵa jáne 5 jylǵa bas bostandyqtarynan aıyrý jazalary taǵaıyndaldy.
72 jábirlenýshiniń azamattyq talap aryzdary tolyq qanaǵattandyrylyp, sot úkiminiń azamattyq talap bóliginde sottalýshylardan olardyń paıdasyna keltirilgen shyǵyn kólemin tolyq óndirý týraly kórsetildi.
Sot úkimi zańdy kúshine engen joq. Taraptar úkimge on bes táýlik ishinde apellıasııalyq shaǵym berýge jáne apellıasııalyq narazylyq keltirýge quqyly, delingen baspasóz habarlamasynda. Sondaı-aq, Aqtaý qalalyq sotynda Mańǵystaý oblysy boıynsha QAJD GM-172/6 mekemesiniń basshysy T.-ǵa qatysty sot úkimi jarııalandy.
Sotta anyqtalǵandaı, sottalýshy T. mekeme bastyǵy qyzmetin atqaryp júrip, paıdaqorlyq nıetpen, memlekettik fýnksııalardy oryndaýǵa ýákilettik berilgen laýazymdy adam bola tura, laýazymdyq jaǵdaıyna baılanysty para alýǵa yqpal jasaı otyryp, jalpy qamqorlyǵy jáne jol berýshiligi úshin múlik sıpatyndaǵy para alý maqsatynda sybaılas jemqorlyqqa qatysty qylmys jasaǵan. Iаǵnı, jazasyn óteýshilerdiń birinen týystary arqyly jańa noýtbýk alǵan.
Sot úkimimen T. Qazaqstan Respýblıkasynyń Qylmystyq kodeksiniń 366-babynyń 3-bóliginiń 1 tarmaǵymen kináli dep tanylyp, jeke menshigindegi qylmystyq jolmen tabylǵan múlki tárkilenip, «ádilet maıory» arnaýly ataǵynan aıyrýmen birge, memlekettik qyzmettegi belgili bir laýazymdardy atqarý quqyǵynan ómir boıyna aıyra otyryp, oǵan 7 jyl merzimge bas bostandyǵynan aıyrý jazasy taǵaıyndaldy.
Sot úkimi zańdy kúshine engen joq.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy
