Aımaq basshysynyń aıtýynsha, oblys ónerkásibindegi ósim 4,1 paıyzdy quraǵan.
«Bul rette mańyzdy ról atqarǵan birden-bir jaıt oblystaǵy kásiporyndarda tehnologııalyq jańǵyrtý jumystaryn júrgizý boldy. Tek iri kompanııalardyń ózderi ǵana tehnologııalary men jabdyqtaryn jańartýǵa shamamen 140 mlrd teńge bólgen. Sonyń nátıjesinde barlyq júıe qurýshy kásiporyndar óndiris kólemin ulǵaıta aldy. Atap aıtsaq, jyl sońyna deıin «ArselorMıttal Temirtaý» AQ 4,2 mln tonna bolat, «Qazaqmys Korporasııasy» JShS 320 myń tonna mys, «Shubarkól Kómir» AQ 11 mln tonna kómir óndiredi dep josparlanyp otyr», dedi Erlan Qoshanov.
Sonymen qatar ol «Bıznestiń jol kartasy-2020» baǵdarlamasy boıynsha 183 jobaǵa qoldaý kórsetilgenin jáne osy sekildi memlekettik qoldaýdyń arqasynda 24 mlrd teńge kóleminde jeke ınvestısııalar jumyldyrylyp, 800 jańa jumys oryndaryn qurý múmkindigi týǵanyn tilge tıek etti.
«Oblystyń aýyl sharýashylyǵy salasynda da jetistikter az emes. Oblys tolyǵymen ózin negizgi azyq-túlik túrlerimen qamtamasyz etip otyr. Jáne de Astana qalasyna jyl basynan beri 16 myń tonna aýylsharýashylyq ónimderin jiberip, shetelge shyǵaryp, óndiris kólemin 24 paıyzǵa ulǵaıtqan», dedi ol.
Oblysta smart-medısına belsendi túrde engizilýde. Ol úshin aımaqtyń barlyq aýrýhanalary men emhanalary biregeı aqparattyq jeli qurǵan. Erlan Qoshanov emhanalarǵa kelýshilerdiń úshten bir bóligi dárigerge qaralýǵa jazylý úshin aqparattyq qyzmet túrin paıdalanatynyn atap aıtty. Sondaı-aq bilim berý salasynda da birqatar jumystar atqarylyp, jańa mektepterdiń qurylysy júrip jatqanyn jetkizdi.
О́ńir basshysynyń sózinshe halyqaralyq EKSPO-2017 kórmesine Qaraǵandy oblysynan 3 myńnan asa adam kelip qatysqan. Sonymen birge óndiristerin jetildirý úshin oblystyń kásiporyndary halyqaralyq kórmede usynylǵan jańa zerttemelerdiń arasynan 31 jobany iriktep, olardy ári qaraı júzege asyrý amaldaryn qarastyrýda. Kórmede qaraǵandylyq ǵalymdar usynǵan jobalardyń ishinen úsheýi qoldanysqa engizilgen. Olar – bıozgaz qurylǵysy, shaǵyn GES jáne gıdrodınamıkalyq jylytqyshtar. Taǵy 4 joba testileý jáne júzege asyrylý kezeńinde.
«Qazirgi tańda ózekti de trendti baǵyt – jańǵyrmaly energııa kózderine qatysty da Qaraǵandy óńiri alǵa jyljyp keledi. Oblysta jalpy qýattylyǵy 261 MVt quraıtyn 6 jańa jasyl energetıka nysandarynyń qurylysy josparlanǵan. Ol – 3 kún elektr stansalary, 2 jel parki jáne 1 bıogaz qurylǵysy», dedi ákim.
Oblys basshysy «Týǵan jer» baǵdarlamasy sheńberinde aımaqta jalpy somasy 13 mlrd teńgeni quraıtyn 400 joba júzege asyrylyp jatqanyn, onyń ishinde 5 mlrd teńge demeýshilerdiń bólgen qarajaty ekenin alǵa tartty.
«Rýhanı jańǵyrýdyń» jarqyn mysaly retinde Ulytaýdaǵy týrıstik ınfraqurylymnyń damýyn keltirýge bolady. Kıeli mekende qonaq-ortalyǵy men etnoaýyldyń qurylysy josparlanyp otyr. Al kelesi jyly Ulytaýda etnofestıval ótedi, sondaı-aq álemniń túrli elderinen jınalatyn arheologtar, geologtar jáne tarıhshylardyń qatysýymen halyqaralyq sımpozıým uıymdastyrylady degen jospar bar», dedi Erlan Qoshanov.
Raýan QAIDAR,
«Egemen Qazaqstan»
