Merzimi 7 jylǵa deıin beriletin nesıeniń jyldyq mólsherlemesi 6 paıyzdy quraıdy. Bul qarjy nátıjeli jumyspen qamtý jáne jappaı kásipkerlikti damytýdyń 2017-2021 jyldarǵa arnalǵan baǵdarlamasynyń ekinshi baǵyty aıasynda usynylyp otyr.
Baǵdarlama jumyssyzdarǵa, ózin-ózi qamtyǵan azamattarǵa, aýyl sharýashylyǵy kooperatıvteri men olardyń múshelerine, sondaı-aq, bastaýysh jáne jumys istep turǵan kásipkerlerge arnalǵan. Memlekettik baǵdarlamany júzege asyrý úshin 2,6 mlrd teńge bólingen. Bul týraly Túrkistan jáne Kentaý qalalarynda ótken kóshpeli semınarda Ońtústik Qazaqstan oblysy ákiminiń orynbasary Baýyrjan Jamalov málimdedi. Onyń aıtýynsha, baǵdarlamanyń maqsaty – shaǵyn bıznesti damytý úshin halyqqa qarjy kózin usyný.
- Nátıjeli jumyspen qamtý jáne jappaı kásipkerlikti damytýdyń 2017-2021 jyldarǵa arnalǵan baǵdarlamasyna óńirimizdegi 3 qala – Shymkent, Túrkistan jáne Kentaý turǵyndary qatysa alady. Baǵdarlamanyń ekinshi baǵytyn júzege asyrý úshin 2,6 mlrd teńge bólingen. Búgingi tańda osy baǵdarlama boıynsha 6 qarjy ınstıtýty jumys jasaýda – Qazaqstannyń halyq banki, Nurbank, ATF Banki, Evrazııalyq bank, Forte Bank jáne «Yrys» MQU, - dedi oblys ákiminiń orynbasary Baýyrjan Jamalov.
Bul tusta eger kepildikke qoıylatyn múlik jetkiliksiz bolsa, onda bastaýysh kásipkerlerge kepildendirilgen kepildi qoldanýǵa múmkindik bar.
- Ár nesıe rásimdeý úshin kepildik kerek. Eger kepildik jetispese, onda «Damý» kásipkerlikti damytý qory arqyly kepildendirilgen kepildi qoldanýǵa bolady. Bul baǵdarlamanyń basqalarynan ereksheligi – jeńildetilgen nesıe berýde. Buǵan qosa nesıe buryn az mólsherde berilse, qazir 18 mıllıon teńgege deıin qarastyrylǵan. Jáne buǵan deıin kepil múlkine qatysty qıyndyqtar týyndasa, qazir kepildendirý qarastyrylyp otyr, - dep atap ótti OQO kásipkerlik, ındýstrıaldy-ınnovasııalyq damý jáne týrızm basqarmasy basshysynyń orynbasary Baǵlan Jumashbekov.
Aıta keteıik, nátıjeli jumyspen qamtý jáne jappaı kásipkerlikti damytý baǵdarlamasy Qazaqstanda jyl basynan beri júzege asyrylýda. Bankterge qarjy - qyrkúıek aıynda, al mıkro qarjy uıymyna ótken aptada bólindi. Qazir eń bastysy – shaǵyn bıznesti damytýǵa bólingen memlekettik qarjyǵa qol jetkizýdi ońaılatý.
