Kartınada túz taǵysynyń tabıǵı bolmysy men qolǵa ustaýǵa kónbeıtini keńinen baıandalady. Alaıda óziniń oılaǵan maqsatyna jetý úshin táýekelge bel baılap, basyn qaterge tikkender de bar. Máselen Almaty oblysynyń turǵyny Aıdyn Dynǵalıev óz úıinde qasqyr asyrap otyr.
Kópshilikke keńinen tanymal «Kókserek» fılmin kórmegender kemde-kem. Kartınada túz taǵysynyń tabıǵı bolmysy men qolǵa ustaýǵa kónbeıtini keńinen baıandalady. Alaıda óziniń oılaǵan maqsatyna jetý úshin táýekelge bel baılap, basyn qaterge tikkender de bar. Máselen Almaty oblysynyń turǵyny Aıdyn Dynǵalıev óz úıinde qasqyr asyrap otyr.
Adamnyń bitispes jaýy sanalǵan tabıǵattyń taǵysy kózin ashqan bóltirik kezinen bastap Aıdynnyń qolynda. Berik temirden jasalǵan arnaıy torda baǵyp, jiti baqylaýda ustap otyr. «Maqsatym qasqyr men ıtti shaǵylystyryp seleksııa arqyly júregi túkti tóbet tuqymyn alý», deıdi ol. Bul oıyna bel sheshe kirisken Aıdyn jasy altyǵa kelgen túz taǵysyn qolyndaǵy sibir laıkasymen shaǵylystyryp ta úlgeripti. Dúnıege kelgenine eki aıdan endi asqan tórt dúregeıdiń ekeýi kádimgi ıtke uqsasa, ekeýi túz taǵysynan aýmaıdy. Túr-turpaty men minezi de týra qasqyrdyń ózi. Olar ósip-jetilgennen soń taǵy da asyl tuqymdy ıtpen shaǵylystyryp jaqsy tuqym alyp ańǵa salsam degen nıette. «Ony baǵý asa qıyndyq týdyrmaıdy. Aptasyna bir-eki ret etpen qorektendiremin. Qolǵa ábden úırengen. Itti de, adamdy da qasyna jaqyndata beredi», deıdi ol.
Ańshylyqqa áýes jigittiń qolynda asyl tuqymdy birneshe qumaı tazysy da bar. Ǵalamtordaǵy birqatar derekterge súıensek, amerıkalyqtar búgingi tańda qasqyr men ıttiń jarty mıllıonǵa jýyq gıbrıdin asyrap otyrǵan kórinedi. Aıdyn Dynǵalıev syndy mundaı ispen áýestengen azamattar bizdiń elimizde de biren-saran kezdesip júr.
– Qasqyrdy qansha baqsań da ormanǵa qarap ulıdy. Adamnyń qasqyr baǵýy óz ómirine qaýip tóndirý. Kishkene kúshik kezinde ıt pen qasqyr birdeı bolǵanymen, óse kele bóltiriktiń boıynan qasqyrǵa tán minez-qulyq baıqala bastaıdy, – deıdi kınolog mamandar.
Qalaı aıtqanda da, kúnderdiń kúni tabıǵı bolmysyna boı aldyryp, qasqyr qasqyrlyǵyn jasamasa bolǵany.
Arman OKTIаBR,
«Egemen Qazaqstan»
ALMATY
Sýretti túsirgen avtor
