Fılm ıdeıasyn tanystyrýǵa baılanysty ótken qorǵalymda rejısser Aqan Sataev kınostýdııanyń Sarapshylar keńesine daıyndyq kezeńinde atqarylǵan jumystar týraly baıandap, túsirilim tobyn tanystyrǵan soń jańa týyndysyn túsirýge daıyn ekenin jetkizdi.
«Beıbitshilik kindiginde» fılmi Aqmolanyń qarapaıym qaladan el ordasy – Astanaǵa aınalýy men búgingi qalyptasqan kelbetine deıingi kezeńder týraly baıandaıdy. Kartına 1994 jyly astananyń Aqmolaǵa aýysyp, Astananyń qysqa merzim ishinde kún sanap damyp kele jatqanyn jáne álemdegi eń ádemi astanalardyń qataryna engenin kórsetedi.
– Bizdiń fılmimiz saıasat pen saıasatkerler týraly. Sol sebepten de biz Prezıdent hattamasynan, Prezıdent Keńsesinen kóp keńes aldyq. Jańa qalaǵa tý tikken Astananyń alǵashqy kezde basynan ótkergen qıyndyqtary jáne Prezıdent pen aınalasyndaǵylardyń ony qalaı eńsergenderi týraly talaı málimet pen derekke qol jetkizdik. Fılmdegi negizgi dramatýrgııalyq shıelenis te osy turǵyda órbimek, – dedi rejısser.
Bolashaq fılmniń jobasyn tanystyrý kezinde túsirilim toby fılmde qoldanylatyn barlyq buıymdar men kostıýmderdi ákelip, kórme uıymdastyrdy. Sarapshylar keńesi aldynda fılmniń atqarýshy prodıýseri Álııa Meńdiǵojına men kastıng-dırektor Jaına Ábdıeva da sóz alyp, túsirilim alańdary jáne akterler týraly áńgimeledi. Túsirilimder Almaty men Astanada ótedi. Birinshi túsirilim blogy jeltoqsan aıynda Almatyda bastalady. Al qańtar aıynda Astanada jalǵasady. Qazir akterlerdiń plastıkasy jáne sóıleý mánerimen mamandar jumys istep jatyr, óıtkeni olardyń somdaıtyn keıipkerleri ómirde bar adamdar. Akterler muraǵattyq materıaldarmen jete tanystyrylǵan, sebebi munyń akterdiń óz obrazyna enýine áseri mol.
Ekranda N.Nazarbaevtyń beınesin belgili teatr jáne kıno akteri Murat Ahmanov somdaıdy. Sonymen qatar fılmde Erkebulan Daıyrov, Jan Baıjanbaev sııaqty kıno maıtalmandary da boı kórsetedi.
– Basty rólge akter izdegende biz úshin portrettik uqsastyǵynan góri, onyń akterlik sheberligi mańyzdyraq boldy. Fılmde 14 túrli kúrdeli grım jasalady, ony Mark Kýler jasaıdy. Kásibı jasalǵan grım kómegimen akterdiń Elbasymen portrettik uqsastyǵyn keltiremiz. Al ekinshi plandaǵy akterlerdi negizinen túr-álpeti prototıpke uqsaıtyndaryn tańdadyq, – deıdi A.Sataev.
Fılmniń qoıýshy-operatory qazaq jáne qyrǵyz kınosynyń metri – Hasanbek Qydyrálıev («Kóshpendiler», «Mońǵol», «Anaǵa aparar jol», «Baýyrjan Momyshuly» jáne basqalar). Sýretshi-vızajıst jáne protez makııajy boıynsha arnaıy shaqyrylǵan brıtandyq Mark Kýler «Grand Býdapesht oteli» fılmine jasaǵan úzdik makııajy úshin «Oskar» júldesin jáne «Temir ledı» fılmine jasaǵan úzdik makııaj ben shash úlgisi úshin 87-Brıtan kıno akademııasynyń BAFTA syılyǵyn ıemdengen.
«Elbasy joly. Beıbitshilik kindiginde» fılminiń shyǵarmashylyq toby túsirilim jumysyn jeltoqsan aıynda bastap ketpek. Al fılm qalyń kórermenge bir jyldan keıin, 2018 jyldyń jeltoqsan aıynda jol tartady dep josparlanyp otyr. Fılmdi Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» kınostýdııasy men «Sataıfılm» kınokompanııasy birigip túsiredi.
Aıgúl AHANBAIQYZY,
«Egemen Qazaqstan»
ALMATY
