О́z basym bul kisiniń ul-qyzdaryn jáne olardan taraǵan úrim-butaǵyn óte jaqsy bilemin. Qazaqsha bir aýyz sóz túsinbeıdi. Úlken qyzy ýnıversıtette bizben birge oqyǵan. Árıne, orys tobynda. Odan týǵan jıenderi qazir shetelderde bilim alyp jatyr. Aǵylshynshasy sýdaı, al qazaqshaǵa kelgende múlde maqurym...
Azdan soń akademık aǵamyz úıine baryp, tabaldyryqtan attaǵan sátten bastap óz tilin «umytady».
Sonda qalaı bolǵany deımin ǵoı. Bul kisi ana tilimizdiń búgingi aıanyshty halin biz bilmeıdi dep oılaı ma eken?..
Kenet qarap otyrmaı, qasymdaǵy qalamger aǵamyzdyń qulaǵyna sybyrlap:
– Kimge aıtyp tur? – dep suradym.
Aǵamnyń túsi lezde buzylyp, maǵan kózinen ot shasha qarap:
– Túsinbeı otyrsyń ba? – dedi zildenip. – Onyń oıynsha, qazaq tili myna bizge ǵana kerek!..
Nurǵalı ORAZ,
«Egemen Qazaqstan»
