Jıyndy ashqan G.Ábdiqalyqova Elbasy N.Nazarbaevtyń «Qazaqstannyń úshinshi jańǵyrýy: jahandyq básekege qabilettilik» atty Joldaýy ulttyq komıssııanyń jumysyna tyń serpin bergenine toqtaldy.
«Elbasy «Bolashaqqa baǵdar: rýhanı jańǵyrý» maqalasynda «Zaman synynan súrinbeı ótken ozyq dástúrlerdi tabysty jańǵyrýdyń mańyzdy alǵysharttaryna aınaldyra bilý qajet. Eger jańǵyrý eldiń ulttyq-rýhanı tamyrynan nár ala almasa, ol adasýǵa bastaıdy» dep atap ótken bolatyn. О́skeleń urpaq boıynda jat uǵymdarǵa qarsy tura alatyn ımmýnıtet qalyptastyrý, otbasy qundylyqtaryn, Qazaqstan halqynyń ozyq dástúrlerin dáripteý – mańyzdy baǵyt. Bul istiń nátıjeli bolýy memlekettik organdar men qoǵamdyq ınstıtýttardyń ózara tıimdi is-qımylyna baılanysty», dedi G.Ábdiqalyqova.
Komıssııa otyrysynda Qyzylorda jáne Pavlodar oblystaryndaǵy otbasylyq jáne genderlik saıasat tujyrymdamasyn iske asyrý boıynsha 2017-2019 jyldarǵa arnalǵan is-sharalar josparynyń oryndalý barysy jóninde baıandama jasaldy.
Pavlodar oblysynda ónimdi eńbekpen aınalysý jáne jappaı kásipkerlikti damytý boıynsha jumystar belsendi júrgizilip keledi. Jyl basynan beri 329 názik jandy suranysqa ıe 52 mamandyq boıynsha tálim aldy. Oblystaǵy aýyl aımaqtarda áıelderdiń kóshbasshylyq qabiletin arttyrýǵa arnalǵan mektepterdi damytý jumystary istelip jatyr. Máselen, Baıanaýyl aýdanynda taǵy bir osyndaı mektep ashyldy.
Jalpy Pavlodar oblysy qyzmet atqaratyn áıel zatynyń sany boıynsha úzdik úsh óńirdiń qataryna kiredi. Onda názik jandylardyń 30 paıyzy jergilikti ókiletti mekemelerde jumys isteıdi. Aýdandyq máslıhat depýtattarynyń arasyndaǵy áıelderdiń sany 29,4 paıyz, qalalyq máslıhatta 27,3 paıyz, oblystyq máslıhatta 21,9 paıyzdy quraıdy. Oblys ákiminiń orynbasary Meıram Begentaevtyń aıtýynsha, otbasylyq jáne genderlik saıasatty tıimdi júrgizýdiń nátıjesinde aımaqta jetim balalardyń sany azaıǵan. Sonyń nátıjesinde, balalar úıiniń biri jabylyp, ǵımarat ornyna lager ashylǵan.
Qyzylorda oblysynda «Rýhanı jańǵyrý» baǵdarlamasy aıasynda óńirde 135 shara uıymdastyrylyp, olarǵa 7 myńǵa jýyq jastar qatysty. Sondaı-aq, qysqa merzimde kásibı mamandar daıyndaý úshin eki myńnan astam jumyssyz adam oqýǵa jiberildi. Solardyń 70,2 paıyzy názik jandylar eken. «Bastaý-Bıznes» jobasy boıynsha 320 áıel arnaıy trenıngten ótip, sonyń 124-i shaǵyn nesıe alyp, 54-i óz kásibin úıirip áketken.
Sonymen qatar, jıynda 2018 jylǵy aqpanda BUU-nyń salalyq komıtetine usynylatyn Áıelderge qatysty kemsitýshiliktiń barlyq túrin joıý týraly konvensııanyń oryndalý barysy týraly Qazaqstan Respýblıkasynyń kezekti besinshi baıandamasynyń jobasy tanystyryldy.
Abaı ASANKELDIULY,
«Egemen Qazaqstan»
