Keshte aldymen oblys ákiminiń orynbasary Marat Júndibaev oblys ákimi Arhımed Muhambetovtyń quttyqtaý hatyn oqyp berip, jazýshyǵa shapan jaýyp, syı-sııapat jasady. Munan keıin keshti júrgizý tizginin oblystyq Qostanaı telearnasynyń dırektory Erkin Muhamedjanov aldy. Kesh ádettegi toı ıesin maqtaý-madaqtaý dástúrinen ózgerek, jazýshymen suhbat túrinde ótti. Júrgizýshi jazýshy shyǵarmalaryndaǵy keıipkerler tarıhy men taǵdyry, shyǵarmalarynyń týý tarıhy, aıtaıyn degen maqsaty týraly suraqtar qoıyp, Tólen Ábdiktiń ózin áńgimege tartyp otyrdy. Keshke qatysýshylar jazýshynyń oıly da maǵynaly qazaqy áńgimesine sýsyndady.
Keshte Tólen aǵamen birge kelgen belgili jazýshy, Memlekettik syılyqtyń laýreaty Qajyǵalı Muhambetqalıev, Qostanaı oblystyq ardagerler keńesiniń tóraǵasy Kenjebek Úkın, jazýshynyń aýyldas aǵaıyn-aǵasy Kákimjan Kárbozov jazýshyny mereıjasymen quttyqtap, onyń shyǵarmashylyǵyna tabys tiledi. Jankeldın aýdanynyń ákimi Shota Ospanov jerles jazýshyǵa «Jankeldın aýdanynyń qurmetti azamaty» lentasyn tapsyrdy.
«Týǵan jer, týǵan jerdiń topyraǵy» degen uǵymdar óte kıeli. Tólen 50 jasqa tolǵan mereıtoıyn óziniń týǵan aýyly Kólqamysta ótkizdi. Sonda úsh shaldyń ortasyndaǵy jalǵyz ul bolyp ósken Tólenniń ómir jasyn uzaq et dep, týǵan jerdiń topyraǵyna aýnatyp alyp edik. Sol tilegimiz qabyl bolyp, Tólenjan 75 jasqa da tolyp otyr. Alda da ómir jasyn uzaq etsin. Biz bala kezimizde birge óstik. Aǵaıynbyz. Úsh otasynyń ortasyndaǵy jalǵyz uldyń qalaı óskeni kóz aldymyzda, onyń shyǵarmalarynyń barlyǵyn shaǵyp oqymaǵan bala-shaǵa, úlken joq aýylda. Búkil Qazaqstanǵa ǵana emes, odan da syrt jerlerge belgili qalamger bolǵan Tólen bizdiń maqtanyshymyz, búkil aýyl onyń tilegin tileıdi» dep tebirene sóıledi aǵaıyn aǵasy Kákimjan Kárbozov aqsaqal.
Jerlesterimen qaýyshý keshin jazýshynyń ózi qorytyndylady. Jerlesterine rahmet aıtty. Kesh ádettegideı án men kúımen órenektelip otyrdy.
Názıra Járimbet
«Egemen Qazaqstan»
Qostanaı
