Tamara Dúısenova Oral qalalyq eńbekpen qamtý ortalyǵyn aralap, elektrondy kezektiń tıimdiligin, kelýshilerge qolaıly jaǵdaı jasalýyna pármen berdi. Jańa jyldan bastap az qamtylǵan otbasylaryna memlekettik ataýly áleýmettik kómek berý tártibi ózgeretinin, oǵan daıyndyqty búginnen bastap qolǵa alý qajettigin mınıstr jergilikti qyzmetkerlerge naqty tapsyrdy.
Budan keıin Tamara Qasymqyzy «Oral «Zenıt» zaýytynda» bolyp, óńirdegi iri mekeme-kásiporyn basshylarymen kezdesti. Ujymynda 500-den asa adam qyzmet etetin iri kásiporyndardyń sany Batys Qazaqstan oblysynda 23 eken. Elimizde qolǵa alynǵan modernızasııa, kásiporyndarǵa jańa tehnologııanyń jappaı engizilýi atalǵan iri kásiporyndarda jumys qolyn azaıtyp, bilikti mamandardyń jumyssyz qalýyna soqtyrýy múmkin. Munyń aldyn almasa bolmaıdy. Sondyqtan, Elbasy Joldaýynan týyndaıtyn tapsyrmalardy júzege asyrý, sonyń ishinde áleýmettik eńbek salasyn jańǵyrtýdaǵy kadrlar aǵynyn basqarý maqsatynda Oral qalasynda da óńirlik shtab qurylǵan. Bolashaqta kezdesýi múmkin qıyndyqtardyń aldyn alý úshin «Jol qartasy» jasalyp, óńirdegi júıe qalyptastyrýshy kásiporyndaryna usynyldy. Qazirdiń ózinde 9 kásiporyn osy «Jol kartasyna» qol qoıǵan.
- Aldymyzda turǵan úlken másele – elimizde Úshinshi jańǵyrý strategııasyn júzege asyrý negizinde jańa tehnologııalardy engizý bolyp otyr. Al ol degenimiz, kásibı mamandardy talap etetin bolady. Elimizdegi jańǵyrtý strategııasy, bir jaǵynan, jańa zamanaýı múmkindikterge qol jetkizip, jumys sapasyn jaqsartsa, ekinshi jaǵynan, jumys kúshin kóp talap etpeıdi. Iri kásiporyndar jańa tehnologııalardy engizgende birqatar jumysshylar eńbekten bosatylýy múmkin. Tıisinshe jańa zamanaýı qurylǵylardy meńgergender jumysqa alynady. Sondyqtan jaqynda myńdaǵan kásiporyndarda júrgizilgen saýalnama nátıjesinde olardyń 48 paıyzynyń jańǵyrtylatyndyǵy anyqtaldy. Jańǵyrtylatyn kásiporyndar jumys jasaıtyn adamdar jumystan bosatýǵa nemese qaıta daıarlyqtan ótkizýge májbúr bolatyndyqtaryn aıtyp, memleketten qoldaý suraǵan bolatyn. Osy maqsatta elimizdiń barlyq óńirlerinde ashylǵan shtabtarmen aqyldasa kele, Jol kartasyn jasaqtadyq. Sol arqyly jańǵyrtylýǵa baılanysty qysqartýǵa ushyraǵan jumysshylardy qaıta daıarlyqtyn ótkizý kózdelip otyr. Kásiporyn belgili bir adamdy qaıta oqýǵa joldasa, onyń oqý shyǵynynyń 70 paıyzyn memleket óteıdi. Qalǵan 30 paıyzyn atalǵan kásiporynnyń ózderi tóleıdi, - dedi Tamara Dúısenova.
Osy kezdesýde jergilikti kásiporyn basshylary ózderine kezdesip jatqan qıyndyqtar týraly aıtyp ótti. «Zenıt» zaýyty» AQ-nyń bas dırektory Vıacheslav Valıev bıylǵy qazan aıynan zaýytqa túsetin tapsyrys kólemi azaıyp ketkenin málimdedi. «Eger jeltoqsan aıynda jaǵdaı ózgermese, 260-taı adamdy jumystan qysqartýǵa májbúr bolamyz» degen zaýyt basshysy «Jol kartasy» sharttaryna sáıkes jumysshylardy qaıta daıarlyqtan ótkizip, qyzmet baǵytyn ózgertý nátıjesinde jumys oryndaryn saqtap qalý úshin jasalyp jatqan sharýalar týraly aıtyp berdi.
Kezdesýde «Batys Qazaqstan mashına jasaý kompanııasy» AQ bas dırektorynyń orynbasary Natalıa Fadına, «Batys sý arnasy» JShS-nyń dırektory Esenjan Shýnaev, «Batys Qazaqstan elektr jelilerin taratý kompanııasy» AQ-nyń bas dırektory Qýat Mýsın ózderi basqaratyn ónerkásip oshaqtaryndaǵy qazirgi ahýal týraly baıandap, kókeıkesti saýaldaryna mınıstrdiń aýzynan egjeı-tegjeıli jaýap aldy. Máselen, «Batys Qazaqstan mashına jasaý kompanııasy» AQ 2016-2017 jyldary 300 adamdy turaqty jumysqa qabyldap, 140 adamdy qaıta daıarlaýdan ótkizgen.
Osy jıynda bilikti mamandardyń bir óńirden basqa óńirge qonys aýystyrǵan kezinde kórsetiletin áleýmettik qoldaý, memlekettik kómek máselesi de talqylandy. Mınıstr Tamara Qasymqyzynyń aıtýynsha, Soltústik Qazaqstan, Shyǵys Qazaqstan, Qostanaı, Pavlodar óńirlerine baryp qyzmet etemin deıtin mamandarǵa kóship-qoný úshin ótemaqy, páter jaldaý shyǵyndary beriledi. «Bul tizimde Batys Qazaqstan oblysy joq, degenmen, oraldyq kásiporyndar ózderine qajet mamandy aldyryp, qaıta oqytý, qaıta daıarlaý isimen aınalyssa, oqytý shyǵyndaryna memleket kómektesýge ázir» dedi mınıstr.
Taǵy bir úlken jıyn Batys Qazaqstan oblystyq máslıhaty ǵımaratynda ótti. Munda 12 aýdannyń jáne barlyq aýyldyq okrýgteriniń ákimi jınalyp, Eńbek jáne halyqty áleýmettik qorǵaý mınıstriniń óz aýzynan 2018 jyldyń qańtarynan bastalatyn ózgerister týraly estip, keıbir suraqtaryna jaýap aldy.
- Jańa jyldan bastap ataýly áleýmettik kómek tóleý tártibi jańa formatqa kóshedi. AÁK-niń bir úlgisi burynǵysha qarjylaı tóleý bolsa, endi oǵan qosa otbasynda jumys jasyndaǵy azamattarǵa jumys taýyp berý, qaıta daıarlaý, oqytý qyzmetteri de qosylady. Iаǵnı kómekke muqtaj adamdarmen áleýmettik kelisim-shart jasalyp, olardy qur qarjylaı qoldaý ǵana emes, jumyspen qamtý, jańa mamandyq alýyna, kásibin ashýyna kómektesý kózdeledi, - dedi Tamara Dúısenova.
Mınıstr T.Dúısenova budan keıin Oral qalasyndaǵy birqatar áleýmettik nysandardy aralady.
Qazbek QUTTYMURATULY,
«Egemen Qazaqstan»
Sýretti túsirgen Aıbatyr NURASh
