«Bul muz aıdyny EKSPO aýmaǵyna arnaıy jobalanǵan. Kompanııa jobany memlekettiń qatysýynsyz óz qarajaty esebinen júzege asyrdy. Muz aıdyny kórme kezeńinde týrıster arasynda tanymal bolǵan eki «jalyndy» sýburqaqtarynyń arasynda ornalasqan. Muz aıdynynyń pishini Nur álem pavılonyna baǵyttalǵan jebege uqsas. Onyń qaq ortasynda jaryq boıaýlarynyń kómegimen EKSPO logotıpi beınelengen. Sondaı-aq, muzaıdynynda keshki ýaqytta jarqyraıtyn jaryq joldar tóselgen», - dedi «MegaIce» kompanııasynyń dırektory Erlan Úmbetov.
Arnaıy tońazytqysh jabdyǵynyń kómegimen muz aıdy +10 gradýs jáne odan tómen temperatýrada da jumys isteı alady. Bul konkımen syrǵanaý maýsymyn kelesi jyldyń sáýir aıyna deıin uzartýǵa múmkindik beredi. Muz aıdynynyń sapasy joǵary bolýy úshin muz quıatyn mashınalar qoldanylady.
«MegaIce» kompanııasynyń enshisinde ártúrli ólshemdegi 1000 jup jańa konkı bar. Olar barlyq kelýshilerge jalǵa beriledi. Muz aıdynynda konkımen syrǵanaýdy jańa bastaǵan kelýshilerge jattyǵý qurylǵylary usynylady. Muz ústinde tártip pen qaýipsizdikke jaýapty mamandar, nusqaýshylar bolady. Kelýshiler úshin jeke zattardy saqtaý oryndary, kıiný bólmeleri, sondaı-aq ystyq tamaq berý oryndary qarastyrylǵan.
«Jańa muz aıdyny qala turǵyndary men qonaqtarynyń súıikti demalys ornyna aınalady. Bul demalys ýaqytyn taza aýada ótkizýge múmkindik beredi», dedi Erlan Úmbetov.
Muz aıdynyna kirý bıletiniń quny - 1000 teńge. Oqýshylar men zeınetkerler úshin 50% jeńildik qarastyrylǵan. 6 jasqa deıingi balalar úshin kirý tegin. Bıletterdi EXPO-2017 resmı saıtynan, bılet operatorynyń saıtynan jáne EKSPO aýmaǵynda ornalasqan kassalardan satyp alýǵa bolady. Muz aıdynynyń ashylýyna oraı, demalys kúnderi Astana qalasynyń qonaqtary men turǵyndaryna arnalǵan 50% jeńildik qarastyrylǵan.
Muz aıdyny jumys kúnderi saǵat 12.00-den 23.00-ge deıin (tehnıkalyq úzilis: 16: 00-den 18: 00-ge deıin), demalys jáne mereke kúnderi saǵat 10.00-den 23.00-ge deıin (tehnıkalyq úzilis 13.00-den 14.00-ge deıin, saǵat 17.00-den 18.00-ge deıin) ashyq.
