Daryndarymyzdyń mundaı aýqymy úlken mýzykalyq oqıǵaǵa ortaqtasýy elimizdiń Eýropalyq habar taratý odaǵyna (European Broadcasting Union, EBU) qosylý josparyn jaqyndata túspek.
«Halyqtyń ishinen álemdi moıyndatýǵa laıyqty talanttar tabyla bermek. Muny Qazaqstan ártúrli halyqaralyq deńgeıdegi saıystar kezinde birneshe ret dáleldep úlgerdi, deıdi «31 arnanyń» bas dırektory Baǵdat Qojahmetov. – Búldirshinderimizdiń «Balalar Eýrovıdenıesi» baıqaýynda óner kórsetýi – uzaq merzimdik yntymaqtastyqqa alyp barar alǵashqy qadamnyń biri».
Sonymen «Eýrovıdenıede» óner kórsetetin jas talanttyń biri Muhammed-Álı Júginisov 14 jasqa endi tolǵanyna qaramastan, halyqaralyq saıystardyń laýreaty atanǵan. Grekııada ótken halyqaralyq «Paradise Holiday» festıvaliniń Gran-prı júldegeri. 11jasynda halyqaralyq «Detskaıa novaıa volna-2014» baıqaýynda 3-oryn ıelengen, al 2016 jyly Máskeýde ótken Igor Krýtoıdyń «Bıtva talantov» baıqaýynyń bas júldesin jeńip alǵan.
«Detskaıa novaıa volna-2015» baıqaýynda «Gaýhar qol» syılyǵyn ıelengen Danelııa Tóleshova da odan qalyspaıtynyn jýyrda ǵana jazdyq. Danelııa – «Golos. Ditı» mýzykalyq baıqaýynda erekshe kózge túsken ánshiniń biri. Tóleshova Demı Lovatonyń Stone Cold ánimen sanaýly sekýndtarda qazylardy ózine qaratqany belgili. Youtube-tegi bul beınejazba mıllıonnan astam kórsetilim jınady.
Sahnaǵa úsh jasynan bastap shyqqan Alýa Serikhanova da talaı respýblıkalyq baıqaýdyń júldegeri. Bıyl kóktemde Belarýs elinde ótken «Zolotye klıýchı» baıqaýynda birinshi oryn aldy.
Al Marııa Zatvarnıskaıa men Merhat Jylqybaev Álııa Nazarbaeva uıymdastyrǵan «Bala daýysy» Birinshi ulttyq balalar án baıqaýynyń jartylaı fınalyna deıin jetkenin bilemiz. 12 jastaǵy Masha Zatvarnıskaıa daryndy balalarǵa arnalǵan mýzykalyq mektep-ınternatta vokal jáne fortepıanodan dáris alady. 13 jastaǵy Merhat Jylqybaev dombyranyń qulaǵynda oınaıdy jáne mekteptiń kóńildi tapqyshtar klýbynyń múshesi.
Aınash ESALI,
«Egemen Qazaqstan»
ALMATY
