2011 jyly Qarqaraly aýdanyndaǵy Taldy-2 qorymyn zertteý nátıjesinde tabylǵan arheologııalyq jádigerler negizinde jańa ekspozısııa «Saq mádenıeti» zaly da búginde biregeı oryn bolyp tabylady.
Sonymen mereıtoıǵa oraı mýzeıde «XXI ǵasyrdyń mýzeıi: mýzeılerdiń damýyndaǵy qazirgi zamanǵy tendensııalar jáne perspektıvalar» atty respýblıkalyq ǵylymı-tájirıbelik konferensııa boldy. Jáne de «Saryarqanyń tarıhı-mádenı qundylyqtary» atty ǵylymı katalog pen «Tarıh jáne mýzeı» atty monografııanyń tusaýkeser rásimi uıymdastyryldy.
– Biz mereıtoıǵa oraı túrli ýaqyttarda bizge deıingi qyzmetkerler júrgizgen zertteýlerdi biriktirip, ǵylymı jınaq daıarladyq. Myna monografııa Qaraǵandy oblysynyń murajaı isi, óńir tarıhy týraly. Sondaı-aq ishine 300-den asa baǵaly jádiger engen ǵylymı katalogty basyp shyǵardyq, – deıdi oblystyq tarıhı-ólketaný murajaıynyń dırektory Erjan Nurmaǵanbetov.
Mereıtoı qurmetine oraı uıymdastyrylǵan saltanatty sharaǵa Qazaqstannyń túrli aımaqtarynan mýzeı mamandary, ǵalymdar men mádenı-ǵylymı ortalyq ókilderi shaqyrylǵan.
Shara barysynda oblystyq tarıhı-ólketaný murajaıynyń úzdik qyzmetkerlerine qurmet gramotalary men alǵys hattar tabystaldy.
Sonymen qatar saltanatty shara barysynda aýdıogıdtiń tusaýkeseri ótti.
– Aýdıogıd – bul túrli tilderde jazylǵan ekskýrsııa, ony jádiger nómiri arqyly tyńdaýǵa bolady. Biz aýdıogıdterdi qazaq, orys jáne aǵylshyn tilderinde daıyndadyq. Bul jumystarǵa shamamen bir jyldaı ýaqyt ketti. Jalpy, Qazaqstanda aýdıogıdter bir jarym jyl buryn paıda boldy. Biz bul qurylǵylardy ózimizde jınaımyz, jabdyqtardy Qytaıdan ákelemiz. Baǵdarlamalyq qamsyzdandyrýdy ózimiz jazamyz, – deıdi «Nurly Ǵalam» JShS ókili Nurlan Garafıev.
«Nurly Ǵalam» JShS daıyndaǵan aýdıogıdter búginde Qazaqstannyń úsh qalasynda – Astana, Qaraǵandy jáne Pavlodarda bar. Oblystyq tarıhı-ólketaný murajaıynda tanystyrylǵan aýdıogıdke jeti tilde 350 faıl júkteýge bolady. Murajaıǵa kelýshige bılet satyp alǵanda qurylǵy beriledi. Ol tyńdaıtyn tili men jádiger nómirin engizip, ekskýrsııany tyńdaı alady.
Kompanııa Qaraǵandy oblysy úshin barlyǵy osyndaı 160 aýdıogıd ázirlegen. Olardyń 40-y oblystyq tarıhı-ólketaný murajaıyna arnalǵan. Qalǵandaryn Jezqazǵan, Balqash, Qarqaraly murajaılary, Oblystyq beıneleý óneri murajaıy, Temirtaýdaǵy Tuńǵysh Prezıdent murajaıy men Dolınkadaǵy Saıası qýǵyn-súrgin qurbandaryn eske alý murajaıy ózara bólisti.
Mıras ASAN,
«Egemen Qazaqstan».
Qaraǵandy oblysy
