Jýyrda óziniń 80 jyldyq tarıhy qarsańynda Qaraǵandy zoobaǵy janýarlardyń taǵy 20 túrimen tolyqty. Atap aıtar bolsaq, olardyń ishinde bir jasar «Champan» zebrasy, amýr jolbarysy, shınshılla jáne elikter bar. Sondaı-aq totyqus, úki sekildi qustardy endi qaraǵandylyq zoobaqqa kelýshiler jaqynnan tamashalaı alady. Mundaı syıdy jergilikti mesenattar men demeýshiler «Jyly júrek – jomart qol» sharasy aıasynda tartý etken.
Jalpy, Qaraǵandy memlekettik zoologııalyq baǵy – elimizdegi eń eski baqtardyń biri. Búgingi tańda munda 200-den astam janýar túri mekendeıdi. Qalalyq haıýanattar baǵynyń dırektory Madına Áshirovanyń aıtýynsha, atalmysh haıýanattar baǵyna zebra alǵash ret ákelindi.
Joǵaryda aıtqan «Champan» zebrasyn syılaǵan demeýshi búgingi tańda qaraǵandylyqtarǵa esimi keńinen tanys «Iýjnyı» sýpermarketter jelisiniń ıesi.
Demeýshiler syılyǵy qala turǵyndarynyń qyzyǵýshylyǵyn arttyra túsýde. «Jyly júrek – jomart qol» sharasy áli de jalǵasyn taýyp jatsa quba-qup.
Mıras ASAN,
«Egemen Qazaqstan»
Qaraǵandy oblysy
