BUU-nyń Burynǵy Iýgoslavııa jónindegi halyqaralyq soty R.Mladıchti Srebrenısada atylǵan 8000 musylmannyń jáne Saraevony 43 aı qorshaýǵa alǵanda qaza tapqan 10 myń azamattyń ólimine kináli dep tapty. Reıter agenttigi taratqan aqparatqa saı, sot sheshimin estigen R.Mladıch yzadan jarylyp keterdeı bolyp, «Munyń bári ótirik, sender ótirikshisińder» dep aıqaı salǵan. Onyń jaqtastary sot sheshimine narazylyq bildirip, úkimdi qaıta qaraýǵa aryz túsiretinin málimdedi.
Reıter agenttigi Srebrenısadaǵy qyrǵyndy ekinshi dúnıejúzilik soǵystan keıingi Eýropada bolǵan eń qatygez oqıǵaǵa balady. General isine tórelik etken sýdıa Alfons Ore de sot úkimin oqyǵanda R.Mladıchtiń áreketin adamzatqa jasalǵan eń aýyr qastandyq ekenin atap ótken-di.
«Bosnııa qasapshysy» atymen tanymal R.Mladıchpen birge Bosnııa-Serb ultshyldarynyń burynǵy kósemi jáne etnostyq tazalaýdyń sheberi Radovan Karadjıch jáne olardyń basshysy ári Serbııa prezıdenti bolǵan Slobodan Mıloshevıch te sottalýshylardyń ishinde bar», deıdi Reıter agenttigi.
Sot sheshimin burynǵy Iýgoslavııadan bólinip shyqqan memleketter basshylary qoldap otyr. Serbııa prezıdenti Aleksandr Výchıch genosıd kezinde qaza tapqan bozdaqtarǵa serbterdiń qurmetpen qaraıtynyn málimdedi.
Bes jylǵa sozylǵan sottyń aqyrǵy núktesi qoıyldy. Reıter agenttiginiń málimetinshe, Burynǵy Iýgoslavııa jónindegi halyqaralyq sot osymen óz jumysyn aıaqtamaq. BUU tarapynan 1993 jyly qurylǵan sot Balqan túbegindegi 83 áskerı qylmysqa qatysty sheshim shyǵarǵan bolatyn.
Sholýdy ázirlegen
Abaı ASANKELDIULY,
«Egemen Qazaqstan»
