Mol ınvestısııalyq qarajat óz kezeginde aımaqta ındýstrııaldy-ınnovasııalyq damý baǵdarlamasyn jańa sapalyq deńgeıge kótere bildi. Bul baǵytta atalǵan baǵdarlama sheńberindegi ekinshi bes jyldyq aralyǵynda alynǵan asýlar aýqymy arshyndy. Dál osy tusta tartylǵan ınvestısııa kólemi -127 mıllıard teńgeni qurapty. Osy arqyly 2000 jýyq jańa jumys ornyn qurýǵa múmkindik týypty. Ári jıyrmaǵa jýyq jobanyń tusaýy kesilipti.
Sondaı-aq ındýstrııalandyrý kartasy aıasynda atqarylǵan jobalar kólemi de kóńilden shyǵady. Munyń ishinde «EKSPO-2017» ınnovasııalyq jobalaryn óndiriske engizý jónindegi bastamalardyń orny aıryqsha. Osyǵan oraı oblysta jalpy quny 43 mıllıard teńgeniń 18 jobasy iriktelgen. Búgingi kúni onyń árqaısysyna qatysty jan-jaqty jobalaý jumystary júrgizilýde. Atap aıtqanda bulardyń qatarynda ónerkásip, munaı-gaz óndiristeri jáne aýylsharýashylyǵy salalarynda qaldyqtardy qaıta óńdeý sekildi ómirsheń jobalar jasaqtalǵan.
Osyndaı jetistikter men tabystarda Aqtóbe ındýstrııaldy aımaǵynyń eleýli úlesi bar. Qazirgi kezde onyń qurylǵanyna 2 jyl tolyp otyr. О́ńir ındýstrııasynyń ón boıyna qan júgirtip otyrǵan qurylymnyń jalpy aýmaǵy 200 gektardy quraıdy. Búgingi tańda munda qyzmet jasap júrgen kásiporyndardyń deni óz jobalaryn shetel kapıtaly negizinde júzege asyrýdy. Bulardyń basym bóligi Bolgarııa, Shveısarııa, Germanııa jáne Túrkııa elderiniń jobalary.
– Indýstrııaldy aımaqtyń atqarar qyzmeti san-salaly. Onyń aıasy qomaqty ınvestısııa quıa alatyn otandyq jáne shet eldik kásiporyndardy aımaq aýmaǵyna ornalastyrýmen shektelmeıdi. Buǵan qosa biz osy arqyly óńirdegi salyqtyq bazanyń kólemin odan ári keńeıtý sharalaryn belgilep otyrmyz. Al túpki maqsat –jańa jumys oryndaryn ashýdy odan ári jalǵastyrý bolyp qala bermek, -dedi bizge osy materıaldy gazet óndirisine ázirleý barysynda Aqtóbe oblystyq ekonomıkalyq jáne bıýdjettik josparlaý basqarmasynyń basshysy Oljas Smaǵulov.
Sóz sońynda Aqtóbe ındýstrııaldy aımaǵynyń keleshegi týraly eki-úsh aýyz sóz qosqandy jón kóremiz. Bul birinshi kezekte ındýsrııaldy-ınnovasııalyq turǵydan damýdyń taptyrmas tetigi. Taptyrmas múmkindigi. Ári ındýsrııaldy aımaq óńir ekonomıkasynyń tamyr soǵysyn retke keltire alatyn borometr. Bul qurylym tolyq qaıtarymmen jumys istegen jaǵdaıda óńirdegi tabystar men jetistikter tizbegi de óse túspek. Sonymen birge ındýstrııalandyrý múddesin kózdeıtin qurylym álemdik ólshemder men talaptarǵa saı óndiristiń órisin ashýdyń ómirsheń tásili. Bıyl Aqtóbe ındýsrııaldy aımaǵynyń ıgerilý kórsetkishi 50 paıyzdyq mólsherdi qurady. Onyń qurylǵan eki jyldyq merzimine shaqqanda munyń ózi qanaǵat tutýǵa turatyndaı kórsetkish. О́ıtkeni orys halqy oryndy aıtqandaı Moskva birden turǵyzylmaǵan.
Ekinshi bir qyrynan qarastyrǵanda aımaqtyń aıta qalarlyqtaı mol áleýeti qazirgi kúni tolyq paıdalanylmaı turǵany da aıqyn kórinedi. Alaıda aldaǵy jyly osy olqylyqtyń orny tolyǵatyn túri bar. Osy kezde munda taǵy da on kásiporyn óz jumysyn bastaıdy dep kútilýdi. Sol ýaqyta Aqtóbe ındýstrııaldy aımaǵynyń ıgerilý kórsetkishiniń shamamen 75-80 paıyzǵa deıin kóterýge múmkindikter týatyny anyq.
Temir QUSAIYN,
«Egemen Qazaqstan».
Sýrette: Aqtóbe ındýstrııaldy aımaǵynan kórinis
