Mádenıet jáne sport mınıstri atynan halyqaralyq basqosýdyń sálem sózin jetkizgen atalǵan vedomstvonyń Mádenıet jáne óner isteri departamentiniń dırektory Almas Nurazhan myrza, uıymdastyrylyp otyrǵan sharanyń rýhanı-tarıhı qundylyǵy zor ekenine nazar aýdaryp, ásirese sońǵy jyldary óńirlerge júrgizilgen qazba jumystary kezinde tabylǵan júzdegen artefaktilerdiń jańǵyrýdan ótken sapalylary Ulttyq mýzeı qoryna tapsyrylýy durys sheshim degenge toqtaldy.
Osy oraıda tanymal arheolog Zeınolla Samashevtyń sózine júginsek, astanalyq mýzeı qoryna tapsyrylýy tıis jádigerlerdiń deni ońtústik óńirde júrgizilgen qazba jumystary kezinde tabylǵan dúnıeler deıdi. Atap aıtqanda, ústimizdegi jyly akademık Karl Baıpaqovtyń jetekshiligimen Ońtústik Qazaqstan oblysy jerindegi Qaratóbe, Mirtóbe qalashyqtarynda jáne Otyrartóbe qorǵanynda, sonymen qatar Jambyl oblysy jerindegi Qulan qalashyǵyna júrgizilgen qazba jumystary kezinde tabylǵan qysh qumyralar, tastan, súıekten jasalǵan eńbek quraldary, ǵuryptyq rásimder kezinde paıdalanatyn dúnıeler eken. Bular ýaqyt bólisi turǵysynan ortaǵasyrlyq buıymdar.
Sol sııaqty osy jyly Qazaq ǵylymı-zertteý mádenıet ınstıtýtynyń qyzmetkeri Tatıana Loshkovanyń jetekshiligimen júrgizilgen Ústirttegi ejelgi qola dáýir murasy Toqsanbaı qonysynan jáne arheolog Aleksandr Gorıachev jetekshilik etken Túrgen shatqalyndaǵy Qyzylbulaq qonysynan tabylǵan qundy dúnıelerge de ınteraktıvti grafıkalyq ınterfeıs jasalyp, joǵarydaǵy jádigerlermen qatar elordalyq mýzeı qoryna tapsyryldy.
Tústen keıin konferensııaǵa qatysýshylar plenarlyq otyrystarǵa jiktelip, ol jerde ótken zamandardaǵy qorǵan salý mádenıeti men jerleý rásimderi, dinı-ǵuryptyq nysandardyń erekshelikteri talqylaýǵa salyndy. Sonymen qatar Qazaqstan, Reseı, О́zbekstan, Ázerbaıjan arheologteri qazba jumystary kezinde óz elderiniń terrıtorııasynan tabylǵan, biraq bárine ortaq jádigerlerdiń salystyrmaly saraptamalyq nátıjelerin qarap, ortaq toqtam jasady.
Beken QAIRATULY,
«Egemen Qazaqstan»
