Brazılııa tórine tóselgen kilemge Latyn Amerıkasynyń Meksıka, Brazılııa, Paragvaı, Ýrýgvaı, Perý, Chılı, Kolýmbııa, Argentına elderiniń balýandary qatysty.
Panamerıka chempıonatynda segiz eldiń balýandary 80 jáne 80 keliden joǵary salmaq dárejesinde kúreske tústi.
Dúnıejúzilik qazaq kúresi federasııasynyń birinshi vıse-prezıdenti Serik Túkıev elimizden barǵan delegasııany bastap bardy. Úıretýshi maman retinde kúrteshe kıip, kilemge de shyqty. Bapker bolyp talaı balýannyń tomaǵasyn sypyrǵan maman Latyn Amerıkasyndaǵy atan jilik, apaıtós balýandarǵa ulttyq kúresimizdiń ádis-tásili men ereksheligin úıretti.
Nurlybek Ermaǵambetov Brazılııa jerinde balýandarǵa beldesýdiń qyr-syryn úıretýmen birge bapkerlerge, tóreshilerge arnaıy semınar, keńester ótkizdi.
«Qazaq kúresinen PanAmerıka chempıonatyn ótkizýdegi maqsatymyz – ulttyq kúresimizdiń nasıhatyn arttyrý. Aldaǵy ýaqytta Latyn Amerıkasy elderinde qazaq kúresiniń federasııalary ashylyp, ulttyq sportymyzben shuǵyldanýshylardyń sany kóbeıse – eńbegimizdiń aqtalǵany. Bizdiń basty muratymyz – qazaq kúresin jazǵy Olımpıada oıyndarynyń baǵdarlamasyna engizý. Alla sátin salsa, ol kúnge de jetemiz. Qazaq kúresinen álemniń 40-qa jýyq elinde federasııalar ashyldy. Álemniń 80-nen astam elinde federasııamyz ashylyp, ulttyq kúresimiz keńinen taralsa, bizge Olımpıada oıyndaryna jol keńinen ashylady. PanAmerıka chempıonatyn uıymdastyrýdaǵy, arnaıy semınar, keńester ótkizýdegi kózdegenimiz de osy qurlyqta federasııalar ashý», – deıdi Serik Adamuly.
Dzıýdo kúresi men jekpe-jek sportyna óte beıim alyp deneli panamerıkalyqtar ulttyq kúresimizben shuǵyldanýǵa erekshe yqylas tanytty deıdi birinshilikti uıymdastyrýshylar.
