Jańa ortalyqta quqyq qorǵaý organdary qyzmetkerleriniń oqý-jattyǵý jıyndaryn ótkizýge barlyq jaǵdaı jasalǵan. Munda zamanaýı ınteraktıvti tır, qarý-jaraq qoımasy, trenajer zaly, kúres zaly, kedergi jolaqtary bar sporttyq qalashyq, májilis zaly, 50 tósek-oryndyq kazarmalyq úı-jaı men ashana bar.
Ortalyq sońǵy úlgidegi beınebaqylaý jáne arnaıy baılanys júıelerimen, kabınetteri qazirgi zamanǵa saı qurylǵylarmen jabdyqtalǵan. Keler jyly bul jerde atys tıri men taǵy bir sport alańy paıda bolmaq. Aldaǵy ýaqytta ortalyqqa oblysymyzdyń barlyq aýdan-qalasynan polısııa qyzmetkerleri kelip, alty kúndik oqý-jattyǵý jıyndaryna qatysyp, kásibı biliktilikterin arttyratyn bolady.
«Bir jarym jyl buryn bul ǵımarat bos turǵan edi. Qajetti qarajatty bóldik. Endi oblystyq IID jeke qurammen teorııalyq jáne tájirıbelik turǵyda oqytý ótkizý úshin jaqsy baza bar. Munda daıyndyqtyń barlyq túrinen ótý arqyly qıyn da qaýipti qyzmetterińizde kezdesetin kez kelgen jaǵdaıǵa daıyn bolǵandaryńyzdy qalaımyz. Osy rette sizderge aıtar jańalyǵym, kelesi jyly ishki ister qyzmetkerlerine arnalǵan úıdiń qurylysyn bastaımyz», – dedi oblys ákimi Danıal Ahmetov jańa ortalyqtyń ashylý saltanatynda.
Reti kelgende aıta keteıik, bıyl oblystyq bıýdjetten IID materıaldyq-tehnıkalyq qoryn jaqsartý maqsatynda 3,5 mlrd teńge bólinip, 276 avtokólik pen 10 avtobýs satyp alynǵan-dy. Bul rette Shyǵys Qazaqstan oblysynyń ishki ister qurylymyn avtokólikpen qamtamasyz etý jáne tehnıkalyq qarýlandyrý boıynsha respýblıkada alǵashqy orynda turǵanyn erekshe atap ótýge bolady.
Azamat QASYM,
«Egemen Qazaqstan»
О́SKEMEN
