Kezdesýde elimizdiń júz jylǵa jýyq tarıhy bar bas gazetiniń búgingi tynysy baıandaldy. Mazmundyq sapanyń kúsheıgeni, ár salaǵa arnaıy aıdarlar men better ashylǵany, halyqaralyq saraptamalyq maqalalardyń kóbeıgeni sóz boldy. О́z kezeginde sóz alǵan muǵalimder pedagogıka salasyndaǵy oń izdenisterge, ádistemelerge negizdelgen «Tálim» jáne «Bilim» betine baılanysty oń pikirlerin bildirdi. Oqyǵysy kelgen taqyryptar jaıynda oılaryn bólisti.
Máselen, №9 mektep-gımnazııada ótken kezdesýde sóz alǵan tarıh pániniń muǵalimi Botagóz Nurseıitovany elimizge taǵdyr-talaıymen kelgen ulttar men ulystardyń tarıhy qyzyqtyrady. «Stalındik repressııanyń zulmatyn basynan ótkergen ulystardyń ádet-ǵuryp, salt-dástúri, mádenıeti týraly kóbirek jazylsa», deıdi Botagóz. Al Alla Petrovskaıa búgingi jastardyń taǵdyryna kóbirek alańdaıdy.
Ol ǵalamtordaǵy jańalyq, oqıǵalarǵa eliktegen jas óskinderdiń arasynda sýısıdtiń, dinı adasýshylyqtyń tamyry nede, soǵan baılanysty saraptamalyq maqalalar kóbirek jazylsa degen usynysyn jetkizdi. Sonymen qatar kóshelerge jańa esimder berilip jatyr. Adamnyń aty kóshege qandaı eńbegi úshin beriledi? Barmaq basty, kóz qystymen, tamyr-tanyspen ótip ketkender joq pa, nege belgisiz esimder elimizdegi dańqty tulǵalarmen almastyrylmaıdy desti muǵalimder.
Qazaq tili men ádebıeti pániniń muǵalimi Aıgúl Esimbekovany ulystyń uıytqysy bolyp otyrǵan ońtústik óńirine qarata aıtylatyn oǵash sózder oılandyrady eken. Sondyqtan ol ulttyń ustyny bolyp otyrǵan aımaqtyń jaqsylyǵy kóbirek jazylsa degen nıette. Al Shynar Aıdosovany qoǵamdaǵy muǵalimniń bedeli tolǵandyrady. Buryn oqýshylar ustazyn qatty qurmetteıtin edi. Qadirine jetetin, eńbegin baǵalaıtyn. Qazir muǵalim bıliktegilerdiń aıdaǵanymen júretin pendege aınalyp barady. Kóshe sypyrady, aýla tazalaıdy. Saılaý ótetin qarsańda úı-úıdi aralap qujat jınaıdy. Buǵan qashan toqtam bolady?!
№41 orta mektepte de ózekti máseleler kóterildi. Mektep dırektory Aına Abylaıqyzy bilim oshaǵynda eki myńǵa jýyq oqýshy oqyp jatqandyǵyn aıtady. Mektep ujymy Elbasynyń «Bolashaqqa baǵdar: rýhanı jańǵyrý» maqalasyna baılanysty egemendiktermen emen-jarqyn áńgime-dúken qurdy. О́zderin tolǵandyrǵan saýaldaryna jaýap aldy. Oqýshylardyń konserttik baǵdarlamalarymen tanystyrdy.
Ońtústikke belgili ustaz, tarıhshy О́mir Shynybekuly arnaıy sóz alyp, el gazeti «Egemendegi» jaqsy izdenisterge iltıpatyn bildirdi. Gazet basshysy Darhan Qydyráliniń Ońtústikke kelgen saparynda ózin izdep taýyp, pedagogıka salasynda pikirin tyńdaǵandyǵyna qarapaıym muǵalimdi baǵalaǵanyna súıinishin bildirdi. Bas gazettiń ustazdar qaýymy úshin úlken aqylshy, kómekshi ekendigin aıtty.
Muǵalimderdi tolǵandyratyn saýal kóp. Latyn álipbıi jaıy, úshtildilik máselesi de kóterildi. Qaı-qaısysy da muǵalimderdi aınalyp ótpeıdi. Tikeleı aınalysatyn negizgi býyn bolǵandyqtan alańdaýlary zańdy. О́ıtkeni búgin ustazy myqtynyń ozatyn zamany.
Baqtııar TAIJAN,
Ǵalymjan ELShIBAI,
«Egemen Qazaqstan»
Ońtústik Qazaqstan oblysy
