Sondaı-aq qazirgi ýaqytta HQKO-na barmaı-aq elektrondyq úkimet portaly arqyly turaqty tirkeýge turý jáne azamattardy tirkeýden shyǵarý mehanızmin 2018 jyly iske qosý josparlanyp otyr. Bul týraly QR Ishki ister mınıstriniń orynbasary Erlan Turǵymbaev málimdedi, dep habarlaıdy Qazaqstan Respýblıkasy IIM Baspasóz qyzmeti.
Halyqqa memlekettik qyzmet kórsetýdiń sapasyn jaqsartý boıynsha IIM júıeli sharalar qabyldap otyrǵanyn atap ótken Ishki ister mınıstriniń orynbasary Erlan Turǵymbaevtyń aıtýynsha, búgingi kúni Mınıstrlik memlekettik qyzmettiń 39 túrin kórsetedi, vedomstvonyń qyzmetkerleri 286 halyqqa qyzmet kórsetý ortalyǵynda jáne 14 arnaıy halyqqqa qyzmet kórsetý ortalyǵynda jumys isteýde.
«2017 jyldyń 10 aıy ishinde azamattarǵa 19 mln. 742 myńnan astam qyzmet kórsetildi, onyń basym kópshiligi – mekenjaı anyqtamalaryn berý, avtokólikterdi tirkeý, halyqty qujattandyrý jáne azamattardy turǵylyqty jáne ýaqytsha turý oryndaryna tirkeý. Memlekettik qyzmet kórsetýdi jeńildetý jáne prosesterdi jyldamdatý úshin IIM olardy elektrondyq úkimet portaly arqyly avtomattandyrýdy belsendi engizýde. Sonymen qatar 2017 jyldyń basynda HQKO-na barmaı-aq onlaın rejımde «elektrondyq úkimet» portaly arqyly ýaqytsha tirkeý júrgizý múmkindigi týdy», deıdi Erlan Turǵymbaev. Sondaı-aq 1 qarashadan bastap ýaqytsha jáne turaqty tirkeý kezinde turǵyn úıge menshik quqyǵy týraly 2-nysandy anyqtamany talap etý joıyldy (tek 25 kún ishinde 138 myń adam tirkeýge turdy, onyń ishinde 115 myń adam – turaqty tirkeýge jáne 23 myń adam ýaqytsha turatyn orny boıynsha tirkeldi). Qazirgi ýaqytta HQKO-na barmaı-aq elektrondyq úkimet portaly arqyly turaqty tirkeýge turý jáne azamattardy tirkeýden shyǵarý mehanızmi pysyqtaldy, ony 2018 jyly iske qosý josparlandy.
Aqparat jáne kommýnıkasııalar, Ádilet, Ishki ister mınıstrlikteriniń aqparattyq júıesin biriktirý negizinde «Elektrondyq úı kitapshasy» jasalyndy, ol árbir eldi meken boıynsha halyqtyń kóship-qonýyna monıtorıng júrgizýdi jaqsartady, úıdiń ıesine onyń menshiginde tirkeýge turǵan adamdar týraly málimet alýǵa múmkindik bermek
