Biz, qazaq eline bıatlonnan Əlem kýbogy kezeńinde alǵashqy júldeni syılaǵan Maksım Braýnnyń anasymen tildestik. Pavlodardaǵy orta mekteptiń birinde muǵalim eken. Horeograf. Aqjarqyn kisi. Aǵynan jaryldy. Ulynyń jeńisinen keıingi əserimen bólisti.
– Əli sene alar emespin. Kesheden beri telefonymyzda tynym joq. Týǵan-týystarymyz, dostarymyz, kórshilerimiz quttyqtap jatyr. Qazaq eliniń mereıi ústem boldy. Maksımdi ǵana emes, barshańyzdy tarıhı jeńisimizben quttyqtaımyn, – dep bastady qýanyshtan kózine jas alǵan Braýn Olga Vladımırqyzy.
– Jarysty qaıdan kórdińizder? Uldaryńyzdyń júlde alatynyna sendińizder me?
– Úıde otbasymyzben otyryp kórdik. Bolashaq kelinimiz de bizben birge boldy. Translıasııany úıde ıntternetten tamashaladyq. Ulymnyń jyldar boıǵy eńbeginiń aqtalǵanyna qýanamyn. Júlde almasa da jerge qaratpaıtynyna sendim. Maksım mərege jetkenshe əzer shydadyq. Abyroı bolǵanda qolaǵa qol jetkizdi. Aldaǵy ýaqytta talaı tuǵyrdan kóretinimizge senimdimiz. Qandaı jarysqa qatyssa da ákesi ekeýimiz tileýshisi bolyp otyramyz.
– Maksım qansha jasynan bıatlonmen shuǵyldanyp keledi? Bul sportty tańdaýynyń syry nede?
– Qatarlastary sekildi alǵashynda fýtbolǵa qatysty. Biraq atasy fýtboldy quptaı qoımady. Qysqy sportpen aınalysqanyn qalady. 4-synyptan bastap bıatlonǵa apardyq. Basynda unatpaı júrdi. Degenmen kóp uzamaı úırenip ketti. Oqýda da úlgerimi jaqsy boldy. Jattyǵýdan qalmaıtyn. Jastaıynan jarystarǵa kóp bardy. Talaı dodada top jardy. El chempıony atandy. Ýnıversıadada jaqsy óner kórsetti. Halyqaralyq dárejedegi sport sheberi. Endi mine buryn-sońdy bolmaǵan jetistikke qol jetkizip otyr. Qoldaǵandarǵa kóp rahmet! Osyndaı bıikten kórinýi bilikti mamandardyń arqasy. Bapkerlerine myń alǵys!
Osydan keıin Maksım Braýnnyń alǵashqy bapkeri Nıkolaı Vydrınge habarlastyq. Shýchınskte oqý-jattyǵý jıynynda júrgen bapker shákirtiniń jetistigine dán rıza eken.
– Jarystan soń Maksım birden habarlasty. Tolqyp júr. Myqtylardan ozǵanyna ózi de qýanyshty. Eki dúrkin Olımpıada chempıony, 11 dúrkin álem chempıony Marten Fýrkadty ozyp ketkenine ózi de sene alar emes. Endi ózińiz oılap kórińiz. Ońaı emes. Keremet jetistik. Jeńis jolyn jalǵastyrady dep senemin.
– Maksımniń alǵash jattyǵýǵa kelgeni esińizde me?
– Ərıne. 2005 jyl bolatyn. Boıy kishkentaı, aryq edi. Biraq, óte eńbekqor-tyn. Jattyǵýdan jalyqpaıtyn. Qıyndyqtan qashpaıtyn. О́zgelerden erekshe boldy dep aıta almaımyn. Degenmen tabandylyǵynyń, tózimdiliginiń, óz eńbeginiń arqasynda osyndaı jetistikke jetti. Shəkirtim úshin qýanyshtymyn.
– Maksımniń jetistigi elimizde bıatlonnyń damýyna qanshalyqty septigin tıgizedi dep oılaısyz?
– Myna bir jaıtqa nazar aýdaraıyq, qazir jurt balalaryn qysqy sportqa kóp əkeledi. Qol astymda 70-ke jýyq jasóspirim jattyǵyp júr. Bul kózqarastyń ózgergeni. Al Maksımniń jeńisinen keıin jurttyń qyzyǵýshylyǵy odan saıyn arta túsetinine senimdimin. О́tkenge kóz júgirtip kóreıikshi, osydan 10 jyl burynǵy jaǵdaı múlde basqa edi. Bıatlonǵa qajetti sporttyq qural-jabdyqtar joq bolatyn. Qazir jaǵdaıymyz jaqsaryp keledi. Memleket tarapynan jumystar jasaldy. Shýchınskte sporttyq baza salynyp jatyr. Iske qosylǵanyn asyǵa kútip júrmiz. Durys jolda ekenimiz anyq. Talaı chempıondardy tərbıeleımiz, buıyrtsa!
Ata-anasy men bapkerleriniń kóz qýanyshyna aınalǵan Maksım Braýndy qazaqstandyq mamandar bolashaǵy zor sportshy dep topshylap otyr. Keler jyly Olımpıada oıyndarynda elimizdiń namysyn abroımen qorǵaıtyn sportshynyń biri deıdi. Al alǵashqy maqtaýyn estip, el nazaryna túskenin bilip júrgen Maksım qazir, bul jetistikpen shektelip qalmaı, kelesi kezeńderge kúsh salady. Aıta keteıik, bıatlonnan Álem kýbogynyń alǵashqy kezeńi 3 jetoqsanǵa deıin jalǵaspaq. Biz, árıne de Estersýndtan eleń etkizer taǵy bir jaǵymdy jańalyq kútetin bolamyz.
Erkebulan Jomart,
«Egemen Qazaqstan».
