Jas urpaqtyń aldynda ózderiniń áskerı boryshtaryn oryndaý, ózderin naqty iste kórsetý, memlekettiń qorǵanys qabiletin nyǵaıtý jolynda óz kúshteri men kásibı bilimderin qaıda jumsaı bilý kerektigin aıqyndaý joly tur.
Sol sebepti Elbasy óziniń Joldaýynda «О́z boıymyzda jáne balalarymyzdyń boıynda jańa qazaqstandyq patrıotızmdi tárbıeleýimiz kerek. Bul eń aldymen elge jáne onyń ıgilikterine degen maqtanysh sezimin uıalatady» dep ómirlik mańyzy bar naqty tapsyrma qoıdy.
Patrıotızmniń negizgi ustanymy Memlekettik jastar saıasaty týraly Zań men Tujyrymdamany iske asyrý sheńberindegi jalpyulttyq tapsyrmalar mártebesine ıe qoǵamnyń rýhanı damýynyń strategııalyq mańyzdy ustanymy bolyp tabylady.
Osyǵan baılanysty memleket qazaqstandyq jastardyń laıyqty ómirin qamtamasyz etýde úlken jumystar atqarýda.
Aǵa urpaqtyń erlik estafetasyn laıyqty jalǵastyratyn, Qazaqstannyń gúldenýi men onyń álemde tanylýy jolynda árdaıym bıikten tabylatyn jastarǵa úlken úmit pen jaýapkershilik júkteledi.
Osydan týra eki jyl buryn, 2015 jylǵy 1 jeltoqsanda, Tuńǵysh Prezıdent kúni Memleket basshysynyń qatysýymen Otanymyzdyń astanasynda Qazaqstan Respýblıkasy Qarýly Kúshteriniń Ulttyq áskerı-patrıottyq ortalyǵy ashylǵan bolatyn.
Ortalyqta azamattardyń, onyń ishinde jastardyń tárbıesinde mańyzdy ról atqaratyn elimizdegi alǵashqy áskerı-tarıhı mýzeı jumys isteıdi. Áskerı-tarıhı mýzeı kóshpendi ulttyń mádenıeti men turmysyna kóńil aýdartý, memlekettiń áskerı tarıhyn, jaýyngerlik dástúrler men rıtýaldardy zerdeleý men nasıhattaý arqyly jastarǵa patrıottyq tárbıe berip keledi. Sonymen qatar mýzeı qonaqtary qazirgi zamanǵy Qazaqstan áskeriniń qalyptasýy men damýynyń tarıhı kezeńderinen de mol maǵlumat alady.
Ortalyqtyń quramyna áskerı orkestr, estradalyq-sımfonııalyq orkestr, folklorlyq-etnografııalyq, bı jáne vokaldy toptardan quralǵan ansambl, sondaı-aq áskerge deıingi jastarǵa patrıottyq tárbıe berýde úlken jumys atqaryp otyrǵan áskerı-patrıottyq jumystar bólimi kiredi.
Búginde Qarýly Kúshterdiń Ulttyq áskerı-patrıottyq ortalyǵy óskeleń urpaqty áskerı-patrıottyq rýhta tárbıelep júrgen jastardyń qoǵamdyq mekemeleriniń qyzmetin úılestirýshi mekemege aınalyp otyr.
Jastar uıymdary men áskerı-patrıottyq klýbtardyń qyzmetin úılestirý maqsatynda ortalyqtyń bazasynda «Jas sarbaz» Respýblıkalyq balalar men jastardyń áskerı-patrıottyq qoǵamdyq birlestigi qurylǵan. Bul qoǵamdyq birlestiktiń fılıaldary barlyq óńirlerde tirkelgen.
Osynyń arqasynda bıylǵy jyly áskerı-patrıottyq klýbtardyń sany 2461-ge ósse, ondaǵy balalar sany 68 803 adam bolyp otyr. Bıyl «Jas sarbaz» qozǵalysy basqa memlekettik organdar men qoǵamdyq uıymdarmen birlesip, respýblıkalyq deńgeıde jastardy áskerı-patrıottyq tárbıeleýde 130 túrli is-shara ótkizdi. Atalǵan sharalar negizinen Qazaqstaan Respýblıkasy Qarýly Kúshteriniń 25 jyldyǵy sheńberinde ótkizilgenin atap ótken jón.
Osy sharalardyń ishinde kólemi jaǵynan úlken «Aıbyn» halyqaralyq áskerı-patrıottyq jastar jıyny bolǵany daýsyz. Aýdandyq, qalalyq, oblystyq deńgeıde ótken irikteý týrlaryna barlyǵy 25 000 baladan turatyn myńnan astam klýb qatysty. Halyqaralyq jıynǵa oblystyq irikteýden oza shapqan klýbtar qatysyp, óz óńirleriniń namysy úshin baq synasty.
Apta boıy jastardy qazaqstandyq patrıotızm rýhynda tárbıeleý boıynsha ıdeologııalyq jumystar júrgizildi. Mádenı-demalys sharalary, konsertter, alaý janyndaǵy keshter uıymdastyryldy. Bozbalalarymyz ben qyzdarymyz sporttyń áskerı-qoldanbaly túrleri boıynsha jáne áskerı-dalalyq taktıkalyq oıyndarda, «Meniń robotym» baıqaýy men «Tank urysy» kompıýterlik oıyndarynda synǵa tústi.
Jas patrıot obrazyn qalyptastyrý men jastardyń shyǵarmashylyǵyn damytýda jyl saıyn rsepýblıkalyq deńgeıde ótkiziletin «Jas ulan» jaýynger ánderiniń festıvali de aıryqsha ról atqarady. О́z tarıhyn 1997 jyldan alatyn festıval qoǵamda tanymal bolyp úlgerdi. Bıyl ótkizilgen festıval qazaqstandyq kompozıtorlardyń Otan týraly armııa týraly shyǵarmalarynyń kóptep oryndalýymen qundy jáne jyl ótken saıyn jastardyń qyzyǵýshylyǵynyń artyp kele jatqanyn kórsetti. Án festıvaliniń qorytyndy kezeńine elimizdiń barlyq óńirinen 212 oqýshy qatysty.
Kadettik synyptardy ashý «Jas sarbaz» qozǵalysy qyzmetiniń basym baǵyttarynyń biri bolyp otyr. Qazirgi tańda elimiz boıynsha 101 kadettik synyp ashylǵan. Onda úsh myńǵa jýyq bala bilim alýda.
Kadettik synyptardyń tárbıelenýshileri ómirge neǵurlym beıimdelgen, olar negizgi pándermen birge áskerı mamandyqtyń qyr-syryn, qol jekpe-jegi urysynyń ádisterin, shet tilderin jáne etıkany oqıdy. Bul synyptardyń tárbıelenýshileriniń bári oqý ozattary.
Jergilikti atqarýshy organdarmen birlesip, dástúrli túrde áskerı-patrıottyq aksııalar, baıqaýlar, vıktorınalar, áskerı-dalalyq oıyndar, áskerılendirilgen estafetalar, «Ashyq esik kúnderi», «Shaqyrylýshy kúni», «Jas armııashy kúni», «Qazaqstan áskerindegi bir kún», «Aq naıza», «Ulan», «Alaý», «Batyr», «Jas ulan» jáne taǵy basqa sharalar ótip turady.
Jyl saıyn oqý oryndarynda «Erlik sabaǵy» ótkizilip keledi. 2017 jyly osy is-sharalarǵa alty myńnan astam áskerı qyzmetshi tartyldy.
Ulttyq áskerı-patrıottyq ortalyq úshin Parlament depýtattarymen, memlekettik organdardyń basshylarymen, Qazaqstan Qarýly Kúshteriniń ardagerlerimen jastardyń kezdesýin uıymdastyrý ıgi dástúrge aınalyp keledi. 2017 jylǵy 23 qarashada Qazaqstan Respýblıkasy Qarýly Kúshteriniń Ulttyq áskerı-patrıottyq ortalyǵynda Parlament Senaty halyqaralyq qatynastar, qorǵanys jáne qaýipsizdik komıtetiniń tóraıymy Darıǵa Nazarbaevanyń tóraıymdyǵymen áskerı-patrıottyq jumystardy odan ári jetildirý máseleleri jónindegi vedomstvoaralyq kezdesý bolyp ótti.
Atalǵan sharaǵa Parlament Senaty men Májilisiniń depýtattary, memlekettik organdar men áleýetti qurylymdardyń basshylary, áskerı-patrıottyq klýbtar men kadettik synyptardyń tárbıelenýshileri qatysty.
Kezdesýdiń qorytyndysy boıynsha sharaǵa qatysýshylar Qazaqstan Respýblıkasynda áskerı-patrıottyq jumystardy odan ári jetildirý máseleleri boıynsha yntymaqtastyq pen ózara is-qımyl týraly memorandýmǵa qol qoıdy.
Kezdesýde sóz alǵan Darıǵa Nazarbaeva jastardyń boıynda joǵary rýhanı-patrıottyq sapa borysh sezimi men azamattyq jaýapkershilikti qalyptastyrý bul barlyq memlekettik organdardyń, jastar uıymdarynyń, otbasy men qoǵamnyń atqaratyn jumysy dep atap ótken bolatyn. Kezdesýde Darıǵa Nazarbaeva «Jas sarbaz» respýblıkalyq balalar men jastardyń áskerı-patrıottyq qoǵamdyq qozǵalysynyń tóraıymy bolyp saılandy.
Qarýly Kúshterdegi áskerı-patrıottyq jumystar áskerı qyzmetshiler men óskeleń urpaqty patrıotızm men Otanǵa degen mahabbat seziminde tárbıeleýge baǵyttalsa, Ulttyq áskerı-patrıottyq ortalyǵy elimizdegi jastarǵa áskerı-patrıottyq tárbıe berýdegi basty ortalyq bolyp otyr.
Muhamedjan TALASOV,
general-maıor
Qazaqstan Respýblıkasy
Qarýly Kúshteri Bas shtaby
bastyǵynyń orynbasary
