Alǵashqy eńbek jolyn qarapaıym jumysshy bolyp bastap, búginde álemdik deńgeıdegi qaıratkerge aınalǵan Nursultan Nazarbaev jastarǵa senim artyp, qaı kezde de qoldaý kórsetip keledi. Ásirese Elbasymen kezdesip, batasyn alǵan jastar búginde elimizdiń ár salasynda eńbek etip, egemen elimizdiń damýyna óz úlesin qosýda.
Taraz qalasyndaǵy «Qazfosfat» jaýapkershiligi shekteýli seriktestigi mıneraldy tyńaıtqyshtar zaýytynyń tehnolog sheberi Bolathan Kóptileýov Elbasymen kezdesken jastyń biri. Bizben áńgimesinde ol Elbasymen kezdesýdegi áserimen bólisti. «2012 jyly Astana qalasynda ótken «Nur Otan» partııasynyń XIV sezinde elimizdiń ońtústik óńirindegi hımııa óndirisi salasynda eńbek etip júrgen jastar atynan sóz sóılegen bolatynmyn. Bir jyldan keıin elordamyzdaǵy Táýelsizdik saraıynda ótken eldegi jetekshi partııanyń XV sezine qatysýdyń taǵy da sáti tústi. Onda «Qazfosfat» jaýapkershiligi shekteýli seriktestigi atynan oblystyq delegasııa quramyna engen edim. Sol jyly Memleket basshysy maǵan óziniń qalamsabyn syılady. Bul meniń jadymda ómirimdegi eń eleýli oqıǵa retinde qaldy. Negizi, Elbasymyz qandaı jıyn bolmasyn halyqpen amandaspaı ketpeıdi ǵoı. Sol joly da Prezıdentimiz jıyn aıaqtalǵan soń minbeden túsip, kópshilikke qaraı bet aldy. Ol kisimen amandasýǵa umtylǵan jurttyń arasynda men de bar edim. Sonda Elbasymyzdy qorshap alǵan toptyń syrtynda qalyp ketken men: «Qurmetti Nursultan Ábishuly», dep sóz suradym. Ol kisi maǵan jalt qaraǵanda jurt ekige jarylǵan edi. «Datym bar edi» dep edim, Prezıdentimiz rııasyz bir kúlip aldy da, «Aıta ǵoı» dedi. Sonyń aldynda ǵana men tús kórgen edim. Túsimde Elbasy maǵan óziniń qalamsabyn syılapty. Men sol qalamsappen Qazaqstannyń bolashaǵyna jospar quryp otyr ekenmin. Prezıdentke kórgen túsimdi aıtyp berip, bata suradym. Sonda ol kisi qoıyn qaltasynan qalamsabyn alyp maǵan ustatty da, alaqanyn jaıǵan kúıi «Áýmın», dedi. Ol qalamsapty men endi sandyqtyń túbinde emes, júregimniń tórinde saqtap júrmin», deıdi ol.
Hamıt ESAMAN,
«Egemen Qazaqstan»
Jambyl oblysy
