Týrnırge tuńǵysh ret Reseıdiń tanymal sportshysy, Rıo-de-Janeıroda ótken Olımpıadanyń kúmis júldegeri, bes dúrkin Eýropa chempıony Iаna Kýdrıavseva keldi. Sondaı-aq Iаna Almatyda jas gımnasshylarǵa sheberlik dáristerin ótkizdi.
Týrnırdiń ashylý saltanatynda sport basqarmasynyń basshylary sóz alyp, bul kúnderi qalada kórkem gımnastıka ǵana emes, jalpy gımnastıkany damytýǵa kóp kúsh salynyp jatqanyn atady.
– Týrnırge talantty jetkinshekter qatysyp otyr. О́te qýanyshtymyz. О́zge elderden kelgen qatysýshylarǵa jáne de uıymdastyrýshylarǵa alǵys bildiremin. Biz árqashanda osy sport túrin qoldaımyz, aldaǵy ýaqytta óz chempıondarymyzdy kóremiz degen úmittemin, – dedi Almaty qalasy Dene shynyqtyrý jáne sport basqarmasynyń basshysy Ábil Dóńbaev.
О́z kezeginde, tanymal Reseı sportshysy Iаna Kýdrıavseva jarysqa arnaıy qonaq retinde shaqyrylǵanyna alǵys aıtyp, izgi tilekterin bildirdi.
Jarysta Qytaı, Qyrǵyzstan jáne Qazaqstan qalalarynan kelgen 3 jastan bastap 16 jasqa deıingi qyzdar óner kórsetti. Jeńimpazdar men júldegerlerge baǵaly syılyqtar men medaldar jıyntyǵy tabystaldy.
– Osyndaı aýqymdy chempıonat ótkizýdi 2013 jyly ózimizdiń kórkem gımnastıka mektebin ashqan kezde josparlaǵan edik. Biz úshin bul óte aıtýly shara. Birinshi týrnırdi byltyr ótkizdik. Qatysýshylar sany kóbeıip keledi. Qazir kórkem gımnastıka elimizde ilgerileı bastady, – deıdi uıymdastyrýshy Mádına Úrkimbaeva.
Sonymen bıyl 14 jastaǵy jasóspirimder arasyndaǵy 1-oryndy almatylyq Anastasııa Kasatkına, 13 jastaǵy gımnasshylar arasyndaǵy 1-oryndy Qazaqstan ulttyq quramasynyń múshesi Sabına Kıkımova, 12 jastaǵylar arasyndaǵy 1-oryndy pavlodarlyq Aıdana Mámjan jeńip aldy.
Aınash ESALI,
«Egemen Qazaqstan»
ALMATY
