Olardyń arasynda óńir turǵyndarynyń áleýmettik-ekonomıkalyq jaǵdaıynyń, ómir sapasynyń jaqsarýyna úlken basymdyq berildi. Jýkov kóshesinde «Nurly jer» baǵdarlamasy sheńberinde júz páterlik eki úı áleýmettik jaǵynan tómen otbasylarǵa berildi. Aımaq basshysy Qumar Aqsaqalov óz sózinde turǵyndardyń áljýaz toptaryna úıler kóp jyldardan beri alǵash ret turǵyzylǵanyn atap ótti. Jyl sońyna deıin 200 myń sharshy metr turǵyn úı, eki jalgerlik-kommýnaldyq jáne 75 páterli ıpotekalyq baspana paıdalanýǵa beriledi. Kelesi jyly 1660 otbasyǵa arnalǵan 15 kóp qabatty úı, «Nurly jol» baǵdarlamasy aıasynda 208 jeke úı boı kóteredi. Búl kúni soǵys, eńbek ardagerleriniń, múgedek jandar men shetten oralǵan aǵaıyndarymyzdyń, kóp balaly otbasylardyń qýanyshynda shek bomady. Solardyń biri – jetim balalar úıinde ósken Dınara Kırıbaevanyń otbasy úsh páterli jaıly baspanaǵa ıe boldy.
Tarıhı-ólketaný murajaıynda ótken dóńgelek ústel barysynda Elbasynyń ómirine, qyzmetine, suńǵyla saıasatkerligine, kóshbasshylyq kemeńgerligine qatysty estelikter men oı-tolǵamdar ortaǵa salynyp, myzǵymas memleket qalyptastyryp, qurýdaǵy, órkenıettiń kóshine qosa bilgen zor úlesi jastarǵa úlgi etildi. Tuńǵysh Prezıdent atyndaǵy zalda fotosýretter kórmesi uıymdastyryldy.
Osy kúni «100 naqty qadam» Ult josparyn júzege asyrý boıynsha Quqyq qorǵaý qyzmetteri ortalyǵy óz jumysyn bastady. Bas prokýratýranyń bastamasymen qoldanysqa engen ortalyqtyń negizgi maqsaty máselelerdi jedel túrde sheshý, jurtshylyqtyń memlekettik jáne quqyq qorǵaý organdaryna senimin arttyrý, qaǵazbastylyq kedergilerdi joıý bolyp tabylady. Jyl saıyn prorýrorlardyń jeke qabyldaýyna 50 myńnan astam adamnyń keletinin eskersek, budan bylaı qabyldaý rásimderiniń barynsha ashyq ári ońtaıly bolary sózsiz. Ortalyq zamanaýı ınjenerlik-tehnıkalyq quraldarmen, «Connection Point» sekildi ınfraqurylymdarmen jabdyqtalǵan.
«Qaıyrymdy jandar-2017» baıqaýynyń qorytyndysy jarııalanyp, qoly ashyq kásipkerler, úkimettik emes uıym men etnomádenı birlestikteriniń ókilderi 6 atalym boıynsha marapattaldy. Olardyń arasynda «Taıynsha-Astyq» JShS-niń dırektory Anatolıı Rafalskııge, «Solnechnyı dom» qoǵamdyq birlestiginiń jetekshisi Anastasııa Shveske, jáne taǵy basqalaryna qurmet kórsetildi. Shekaralyq áriptestikke baǵyttalǵan atalym boıynsha Reseıdiń Túmen oblysynyń qazaqtar qaýymdastyǵy jeńimpaz atandy.
Sol sııaqty turmysy tómen otbasylarǵa, qarttarǵa, zeınetkerlerge, múgedek jandarǵa jan-jaqty qaıyrymdylyq qoldaýlary kórsetilip, jas aqyndar aıtysy, synyp saǵattary, túrli baıqaýlar, taqyryptyq keshter, ekskýrsııalar usynyldy. Eldi mekenderde kóptegen áleýmettik mańyzy bar nysandar boı túzedi.
О́mir ESQALI,
«Egemen Qazaqstan»
Soltústik Qazaqstan oblysy
