Atyraý qalasy mańyndaǵy Jumysker aýylynyń turǵyndary merekeni jańa mádenıet úıinde atap ótti. NKOK kompanııasynyń demeýshiligimen salynǵan ǵımarat kópshiliktiń kóńilinen shyqty. Qala ákiminiń orynbasary Polymbet Hasanovtyń aıtýynsha, atalǵan kompanııa osyndaı taǵy da úsh mádenıet úıiniń salynýyna qarjylaı qoldaý kórsetip otyr.
Jańa áleýmettik nysandar oblys ortalyǵynda ǵana emes, aýdandarda da boı kóterdi. Inder aýdanynyń Qurylys aýylynda orta mektep ashylsa, Inder poselkesinde balabaqsha bóbekterdi qabyldaı bastady. Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda Jylyoı aýdanynyń Shoqpartoǵaı, Jańaqorǵan, Aqkıiztoǵaı aýyldarynda dene shynyqtyrý-saýyqtyrý keshenderi paıdalanýǵa berildi.
Munaıly óńirde sońǵy jyldary qurylys salasy erekshe qarqynmen damyp keledi. Bıyldyń ózinde jeti balabaqsha, bes mektep ashylyp, eki mektep kúrdeli jóndeýden ótti. Atyraý qalasynda, Inder, Isataı aýdandarynda mádenıet úıleri salyndy. Bes sport kesheni iske qosyldy.
Halyqty baspanamen qamtý máselesi de jaqsy jolǵa qoıylǵan. Túńǵysh Prezıdent kúnine oraı Nursaıa shaǵyn aýdanynda 45 páterlik turǵyn úı ıelerine tabystaldy. «Elbasy saıasatynyń arqasynda sáni men sáýleti kelisken kelbetti úılerdiń qatary kóbeıip, turǵyndardy qýanyshqa bólep keledi. Merekemen oraılastyrylyp paıdalanýǵa berilip otyrǵan turǵyn úıden memlekettik jáne bıýdjettik mekeme qyzmetkerleri, halyqtyń áleýmettik áljýaz toptaryna kiretin jáne jastaıynan jetim qalyp, kópten beri baspanasyz júrgen azamattar páter kiltin aldy», dedi saltanatty jıynda qala ákiminiń orynbasary Meıirim Qalaýı.
Baqytgúl BABASh,
«Egemen Qazaqstan»
ATYRAÝ
