Jıynda «Nurly jol» ınfraqurylymdyq damý baǵdarlamasyn iske asyrýǵa bólingen qarajatty paıdalanýdyń jarııalyǵy men tıimdiligin qamtamasyz etý baǵytyndaǵy sharalar talqylandy.
Otyrysty ashqan G.Ábdiqalyqova Elbasy Nursultan Nazarbaevtyń «Eger sybaılas jemqorlyq qylmysyn jasasa, eshkimge de jeńildik jasalmaıdy jáne eshkim jazadan qutylmaıdy» degen sózin atap ótti. Sodan keıin Memlekettik hatshy «Nurly jol» baǵdarlamasynyń oryndalý barysyna toqtaldy. Onyń aıtýynsha, atalǵan baǵdarlamany oryndaý barysynda memleketten eki trıllıon teńge qarajat jumsalǵan.
«Nurly jol» baǵdarlamasy el ekonomıkasyndaǵy qurylymdyq reformalardy jalǵastyrýǵa, tranzıttik áleýetti damytýǵa jáne kólik ınfraqurylymyn halyqaralyq júıege ıntegrasııalaýǵa baǵyttalǵan. Ortalyqta, jergilikti jerlerde onyń ýaqytyly jáne tıimdi oryndalýyn qamtamasyz etý mańyzdy», dedi G.Ábdiqalyqova.
Memlekettik hatshynyń sózine súıensek, búgingi tańda bul baǵytta qabyldanyp jatqan sharalar jetkiliksiz bolyp otyr. Máselen, memlekettik aýdıt organdary baǵdarlamany oryndaý úshin jumsalǵan bıýdjet qarjysyn ıgerýge tekserý júrgizgende 34,3 mıllıard teńge mólsherindegi zań buzý faktilerin anyqtaǵan.
Agroónerkásip salasyndaǵy prokýrorlyq tekserister nátıjesinde jalpy quny 15 mıllıard teńge bolatyn 3,5 myń zań buzý tirkelgen. Sonymen qatar, 2,6 mıllıard teńge kólemindegi sýbsıdııany zańsyz tóleýdiń joly kesildi. Sybaılas jemqorlyqqa qarsy qyzmet 2015 jyldan beri memleket qazynasyna mıllıardtaǵan shyǵyn keltirgen 27 qylmystyq isti qozǵaǵan.
Sondaı-aq, otyrysta Investısııalar jáne damý mınıstrliginiń, Bas prokýratýranyń, Respýblıkalyq bıýdjettiń atqarylýyn baqylaý jónindegi esep komıtetiniń baıandamalary tyńdaldy.
Komıssııa talqylaý qorytyndysy boıynsha ókiletti organdar men kvazı-memlekettik sektor sýbektilerine anyqtalǵan zań buzýshylyqtardy taldaý jáne aldaǵy ýaqytta ondaı kemshilikterge jol bermeý úshin áreket etý tetikterin ázirlep, tıisti sharalar qabyldaýdy tapsyrdy.
Abaı ASANKELDIULY,
«Egemen Qazaqstan»
