Oblystyq aýrýhana dárigerleriniń habarlaýynsha, áli 9 jolaýshy em qabyldaýda. Sonymen qatar, 2 naýqas hırýrgııalyq bólimde, 3 adam travmatologııa bóliminde ortasha aýyr halde. Al jaǵdaıy aýyr 2 jolaýshy jansaqtaý bóliminen áli aýystyrylmaǵan.
Jol apatynan zardap shekken taǵy 2 búldirshin oblystyq balalar aýrýhanasynda emdelip jatyr. Naýqastyń biri - 2007 jyly týǵan. Onyń san súıegine syrtqy fıkserleýshi qurylǵyny qoldaný boıynsha ota jasalyp, ári qaraı emdeý jáne tekserý boıynsha keńes berilgen. Jasóspirimniń qazirgi tańdaǵy jalpy jaǵdaıy aýyr. Al, 2011 jyly týǵan ul bala jansaqtaý bóliminen travmatologııa jáne ortopedııa bólimine aýystyrylǵan, jaǵdaıy turaqty.
Jańaózen qalalyq ákimdiginde jol kólik oqıǵasynan zardap shekkenderdiń januıalaryna moraldik jáne materıaldyq kómek kórsetý úshin jumysshy toby qurylǵan bolatyn. Qazirgi tańda jumysshy top qaıtys bolǵandardyń januıalaryna qajetti materıaldyq kómekter kórsetýde. «Qazaqstan temir joly» AQ tarapynan qaıtys bolǵan 9 januıanyń otbasyna 1 mln. teńgeden, aýyr jaraqat alǵan 9 adamǵa 600 myń teńgeden jáne ortasha jáne jeńil jaraqat alǵan 18 adamǵa 300 myń teńge kóleminde aqshalaı qarajat berilgen.
Sonymen qatar, jol kólik oqıǵasynan zardap shekkenderge materıaldyq kómek kórsetý maqsatynda qoǵamdyq qor qurylyp, qala turǵyndary men oblys aýmaǵynda ornalasqan mekemelerden 300 myń teńge aýdarylǵan.
Qazirgi ýaqytta jergilikti polısııa qyzmeti jol kólik oqıǵalarynyń aldyn alý maqsatynda qoǵamdyq kólikterde artyq jolaýshylar tasymalynyń aldyn alý baǵytynda kúndelikti jedel-profılaktıkalyq sharalar ótkizýde. Ákimdik tarapynan qoǵamdyq kólikterge úsh mezgil monıtorıng júrgizilip jatyr.
25 qarashada Jańaózen qalasy men Teńge aýyly arasyndaǵy temir jol ótkelinde jolaýshylar tasymaldaýshy №3 qoǵamdyq kóligi men teplovoz soqtyǵysqan bolatyn. Apat kezinde 9 jolaýshy qaıtys bolyp, 27-si jaraqat alǵan edi.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy
