Májilis depýtaty Qýanysh Sultanov jetekshilik etken keńes otyrysynda Elbasynyń «Bolashaqqa baǵdar: rýhanı jańǵyrý» baǵdarlamalyq maqalasyn el ishinde keńinen nasıhattaý jumystarynyń jaı-kúıi talqylandy. Sonymen qatar basqosýda sóz alǵan Aqparat jáne kommýnıkasııalar mınıstri D.Abaev jaqynda ǵana óz máresine jetken «Qazaqstannyń 100 jańa esimi» jobasy boıynsha aldaǵy ýaqytqa josparlanǵan jumystarynan habardar etti.
«Biz kúni keshe ǵana Memleket basshysynyń qatysýymen aýqymdy jıyn ótkizdik. Onda qoǵamda qyzý talqylanyp, qatań tarazylaý arqyly «Qazaqstannyń 100 jańa esimi» anyqtalyp, elge jarııa etildi. Atalǵan joba aıasynda biz arnaıy jol kartasyn ázirledik. Nátıjesinde, keler jyly osy úzdik júzdikke engen adamdarǵa arnalǵan 100 telenovella jaryqqa shyǵady degen senimdemin. Mundaı bastama jóninde aldaǵy ýaqytta tolyǵyraq aıta jatarmyz», degen mınıstr Memleket basshysynyń aıryqsha nazar aýdarýyna oraı, júz jańa esimniń qatarynda jobaǵa qatysqan 2 100 adam da nazardan tys qalmaıtyndyǵyn atap ótti.
«Qazaqstannyń 100 jańa esimi» jobasynyń úzdikterin tanystyrý sharasy kezinde Prezıdent Nursultan Nazarbaev jalpy tizimge qansha adamnyń tirkelgenin surady. Men 2 100 adam ekenin atadym. Sol sátte ol osy 2 100 adamnyń barlyǵyn da nazardan tys qaldyrmaı, elge úlgi etý qajettigin aıtty. Sondyqtan biz bul adamdardyń jastar aldynda sóz sóılep, ashyq sabaqtar men kezdesýler ótkizýin quptap, jospar qurýdamyz», dedi D.Abaev.
Keńes otyrysynda Elbasynyń «Bolashaqqa baǵdar: rýhanı jańǵyrý» baǵdarlamalyq maqalasyn keńinen nasıhattaý baǵytynda atqarylyp jatqan sharýalar jaıynda «Egemen Qazaqstan» respýblıkalyq gazeti» AQ basqarma tóraǵasy Darhan Qydyráli baıandady. Onyń aıtýynsha, Elbasy Nursultan Nazarbaevtyń el gazeti – «Egemende» jarııalanǵan baǵdarlamalyq maqalasynda alǵa tartylǵan maqsat-mindetter men talaptardy keńinen túsindirý baǵytynda bas basylym júıeli ári josparly jumystardy qolǵa aldy. Bul jerde eń basty aıta ketetin másele – Memleket basshysynyń osy maqalasynyń eń aldymen «Egemen Qazaqstanda» jaryq kórýi gazettiń mereıin asyryp, oqyrman aldyndaǵy bedelin bıikke kótergeni. Maqalany dúnıe júziniń beldi aqparat quraldary «Egemennen» kóshirip basty. Iаǵnı búkil dúnıe júzi «Egemen» arqyly Elbasynyń maqalasynan birinshi ret qulaǵdar boldy. Sáýir aıynan qarasha aıyna deıin «Rýhanı jańǵyrý» baǵdarlamasy boıynsha – 540, bilim salasyna qatysty 300-den asa maqala jarııalandy. Bulardyń basym bóligi eldegi zııaly qaýym ókilderi men ǵalymdardyń oı-tolǵaýlary, pikirleri», dedi D.Qydyráli.
Al «Qazkontent» AQ basqarma tóraǵasy Evgenıı Kochetov bolsa, «100 jańa esim» jobasyna daýys berýge 342 myń adam qatysqanyn aıtty. «Jalpy joba aıasynda saıtymyzda 2 112 ótinish iriktelip, jarııalandy. 15 qazanda bastalǵan onlaın daýys berýge 302 úmitker ótken bolsa, bir aıǵa jýyq ýaqytta 342 myń qazaqstandyq daýys berýge atsalysty. Salystyrmaly túrde aıtsaq, bul kórsetkish Taraz qalasynyń turǵyndarynyń sanyna teń. Jalpyhalyqtyq daýys berý nátıjesinde 102 úmitker iriktelip, 1 jeltoqsan kúni Memleket basshysy Nursultan Nazarbaevpen kezdesýge qatysty», dedi E.Kochetov.
Onyń aıtýynsha, «100 jańa esim» jobasy boıynsha jumys endi bastaldy. Aldaǵy ýaqytta joba qatysýshylary týraly kitaptar, broshıýralar shyǵarylyp, derekti fılmder túsiriledi. Sondaı-aq olardyń qatysýymen túrli kezdesýler men jıyndar uıymdastyrylady dep josparlanýda.
Nurlybek DOSYBAI,
«Egemen Qazaqstan»
