Bıyl qazaq sýretshisiniń joly bolyp tur. Kámıla muhıttyń ar jaǵyna bastaǵan osy saparynda «Fine Art Studio», «New York Realism», «Art Nomads» sııaqty birneshe kórmege qatarynan qatysyp, jyldar boıy jınaǵan shyǵarmashylyq qorjynyndaǵy jumystaryn kórsetýge múmkindik aldy.
– Áriptesterim halyqaralyq kórmede ulttyq naqyshtaǵy sýretterimdi jaqsy baǵalap, qoshemet kórsetkenine mereıim tasydy. Eńbegim janǵandaı boldy. О́zim de qazaqtyń dástúri men mádenıetin beıneleý óneriniń tilimen nasıhattaı alǵanyma qýandym. Endi maǵan kelesi jyly ótetin «Artexspo New York-2018» halyqaralyq sýretshiler kórmesine shaqyrtý berdi, – deıdi Sýretshiler akademııasynyń korrespondent-múshesi, Mádenıet qaıratkeri Kámıla Japalova.
– Amerıka Qurama Shtattarynan alǵan áserim tamasha! Muhıttyń arǵy betine asyp, qazaq mádenıetin sýret óneri arqyly tanytýǵa qosqan úlesim maǵan kádimgideı shabyt syılady. О́zim úshin de, Qazaq eli úshin de qýandym. Ulttyq naqyshtaǵy jibek mataǵa salynǵan sýretterim amerıkalyqtardyń úlken qyzyǵýshylyǵyn týǵyzyp, aparǵan barlyq jumystarym túgel derlik satylyp ketti.
Bul eldiń ónerge, talantqa degen qurmeti joǵary eken. Kórmege Ortalyq Azııa elderinen on shaqty sýretshi qatysty. Sýretshilerdiń basym bóligi Eýropa elderinen boldy. Kórmeniń ashylý saltanatynda ózim qoldan piship, tikken ulttyq kıimimizdi kıip júrdim. Bul kórmege aǵylyp kelip jatqan sheteldikterge óte unady. Tańdanystary men rızashylyqtaryn jasyrmady, – dedi ol oıyn túıindep.
Osy saparda Kámılanyń sýretshi retindegi taǵy bir uly armany iske asty. Bala kúninen kóksep kele jatqan áıgili mýzeılerdi aralap, tórtkúl dúnıege aty taraǵan qylqalam sheberleriniń shedevrlerin tamashalaǵan.
Sýretshiniń osyndaı iri sheteldik kórmege «Bolashaqqa baǵdar: rýhanı jańǵyrý» baǵdarlamasynyń aıasynda qatysýǵa qarjylyq qoldaý kórsetken Atyraý oblysynyń ákimi Nurlan Noǵaevqa alǵysy sheksiz.
Kámıla – batık tehnıkasy arqyly qaıtalanbas týyndylar jasaǵan qazaq sýretshisi. Onyń qolynan shyqqan jaýharlar tamasha qonaqúılerdiń tórinde, ónerdi baǵalaıtyn kolleksıonerlerdiń úıinde tur.
Aınash ESALI,
«Egemen Qazaqstan»
ALMATY
