Syrdarııa aýdandyq Halyqqa qyzmet kórsetý ortalyǵy bóliminiń basshysy Jumabek Áshimuly bastaǵan ujym jýyrda 100 jasqa jetken Sálıma Kúderbaevanyń úıine baryp, júz jyldyq mereıli jasymen quttyqtap, jeke kýáligin tabystady.
Sálıma apa Ońtústik Qazaqstan oblysynyń Shalqııa aýylynda dúnıege kelgen eken. Ata-anasynan jastaı aıyrylyp, taǵdyrdyń talaı teperishin kórgen. 1933 jyly turmysqa shyǵyp, Qyzylorda oblysyna keledi. Jastaıynan qara jumysqa jegilip, eńbekpen shyńdalyp ósken.
«Kesek te quıdyq, masaq ta terdik, ólmegennen basqanyń bárin kórdik», deıdi keıýananyń ózi. 1941 jyly soǵys bastalyp, joldasy soǵysqa attanady. Er etigimen qan keship, at aýyzdyǵymen sý ishken otty jyldarda Sálıma apa tylda jumys isteıdi. Joldasynyń da jaryq dúnıeni kórer jazýy bar eken. Maıdannan jaralansa da, aman oralady.
Ekeýi 2 qyz, 4 ul tárbıelep ósirgen. Keıýana Tereńózek kentindegi naýbaıhanadan zeınetke shyqqan. Kóptegen marapattyń ıesi. Soǵys ardageriniń jesiri, tyl ardageri qazir nemere-shóbereniń qyzyǵyn kórip otyr. Osyndaı ónegeli ómir súrip, júz jyl ǵumyr keshken keıýanaǵa ortalyq qyzmetkerleri tólqujatyn tapsyryp, batasyn aldy. Bilgenge bul da tarıhı sáttiń biri ǵoı.
Erjan BAITILES,
«Egemen Qazaqstan».
Qyzylorda oblysy
