Telekópir aıasynda elimizdiń barlyq óńirinen 11 tikeleı kórsetilim júrgizilip, sonyń barysynda Qazaqstan Prezıdentine Indýstrııalandyrý kartasynyń eń mańyzdy nysandary kórsetildi.
– Indýstrııalandyrýdyń eń mańyzdy jobalaryn iske qosý jyl saıynǵy ıgi dástúrge aınaldy. Biz búgin metallýrgııa, ónerkásip, qurylys materıaldary, mashına jasaý, kólik jáne logıstıka salalary boıynsha 25 jobanyń iske asyrylýyn bastadyq, – dedi Elbasy.
Nursultan Nazarbaev aýqymdy ındýstrııalandyrý baǵytyn ustanǵanymyzdyń durys bolǵanyn jáne onyń ýaqyt talabyna saı ekenin atap ótti.
– Búkil elimiz boıynsha bir myńnan astam jańa óndiris iske qosylyp, 100 myńnan astam turaqty jumys oryndary ashyldy. Biz búgin «Giessenhaus» jaýapkershiligi shekteýli seriktestiginiń alıýmınıı qospasyn shyǵaratyn, al keleshekte avtomobıl dıskilerin jasaıtyn jobasyn iske qostyq. POSKO, «Evrazholdıng», Tenaris, «Polımetall» sııaqty óz salasynyń kóshbasshysy sanalatyn belgili transulttyq kompanııalar tartylýda, – dedi Memleket basshysy.
Qazaqstan Prezıdenti óndiristik kooperasııa jáne avmobıl qurastyrý salasyndaǵy yntymaqtastyq máselelerine nazar aýdaryp, qazaqstandyq avtozaýyttarda elektromobılder qurastyrýdyń bastalǵanyn aıryqsha atap ótti.
– Búginde Qazaqstanda 18 belgili brendke tıesili avtokólik quraldarynyń túrli modelderi jınaqtalady. Biz olardy Qytaıǵa, Reseıge, Tájikstanǵa, О́zbekstanǵa jáne basqa da elderge eksporttaýdamyz, – dedi Elbasy.
Nursultan Nazarbaev shıkizattyq emes sektordaǵy óndiris kólemin arttyrýǵa jáne onyń el ekonomıkasyndaǵy mańyzdylyǵyna erekshe toqtaldy.
– Hımııa ónerkásibi salasynda «Evrohım» transulttyq kompanııasy kúrdeli tyńaıtqyshtar shyǵarý jónindegi zaýyttyń qurylysyn bastady. 14 farmasevtıkalyq kásiporynda halyqaralyq DjıEmPı standarttary engizildi. Búgin «Hımfarm» aksıonerlik qoǵamy «Polfarma» iri farmasevtıkalyq kompanııasymen birlese júzege asyratyn taǵy bir jobanyń iske asyrylýy bastaldy. Qurylys salasynda negizgi qurylys materıaldary boıynsha ımportqa táýeldilikti joıdyq. Heidelberg, KNAUF, Basf, Sika jáne basqa da sheteldik kompanııalardyń qatysýymen 180-nen astam joba iske asyryldy, – dedi Memleket basshysy.
Sonymen qatar, Qazaqstan Prezıdenti ekonomıkany ártaraptandyrý úshin ınfraqurylymdy damytýdyń mańyzy zor ekenin atap ótip, «Nurly jol» baǵdarlamasy aıasynda Eýrazııalyq mýltımodaldik kólik dáliziniń iske qosylǵanyn jáne «Batys Eýropa – Batys Qytaı» halyqaralyq kólik dálizi qurylysynyń aıaqtalǵanyn aıtty.
– Osy jyldar ishinde 2 myń shaqyrym temir jol, 5 myń shaqyrym avtomobıl joly salyndy. Teńiz jáne áýe aılaqtaryna qaıta jóndeý jumystary júrgizildi. Quryq portynda temirjolǵa jáne avtomobılge arnalǵan parom kesheni iske qosyldy. «Qorǵas – Shyǵys qaqpasy» arnaıy ekonomıkalyq aımaǵy jáne Lıanıýngan teńiz porty jobalaryn júzege asyrý nátıjesinde Azııa-Eýropa baǵytynda Qazaqstan arqyly jóneltiletin konteınerlik júk tasymalynyń kólemi jyl saıyn eselenip keledi. Bul 2020 jylǵa qaraı elimizdiń tasymaldaýdan túsetin tabysyn 5 mıllıard dollarǵa deıin arttyrýǵa múmkindik beredi, – dedi Elbasy.
Nursultan Nazarbaev halyqaralyq «EKSPO-2017» mamandandyrylǵan kórmesiniń tabysty ótkenin atap ótip, Úkimetke kórmede kórsetilgen balamaly jáne jańartylatyn energııa kózderi salasyndaǵy ǵylymı jetistikterdi tájirıbege engizip, qoldaný úshin júıeli jumys júrgizýdi tapsyrdy.
– EKSPO aýmaǵynda «Astana» halyqaralyq qarjy ortalyǵy, «Jasyl» tehnologııalar men ınvestısııalardy damytý jónindegi halyqaralyq ortalyq, IT-startaptar halyqaralyq tehnoparki qurylatyn bolady. Olardyń ýaqtyly iske qosylyp, tolyq jumys isteýin qamtamasyz etý kerek, – dedi Qazaqstan Prezıdenti.
Sondaı-aq, Memleket basshysy «Sıfrlyq Qazaqstan» memlekettik baǵdarlamasy aıasynda 4.0. Indýstrııasynyń tehnologııalaryn engizip, bul salada ındýstrııalyq turǵydan damyǵan eldermen jáne EAEO-ǵa múshe memlekettermen yntymaqtastyqty nyǵaıtý qajet ekenin aıtty. Budan bólek, Elbasy sıfrlyq tehnologııalar salasyndaǵy zamanaýı mashyqtardy meńgergen mamandardy daıyndaýdyń mańyzdy ekenine nazar aýdardy.
Nursultan Nazarbaev Qazaqstannyń Ekonomıkalyq yntymaqtastyq jáne damý uıymynyń Investısııalar jónindegi komıtetiniń múshesi bolyp, Yntymaqtastyqtyń eldik baǵdarlamasyna qol qoıǵanymyzdy, sondaı-aq ulttyq ınvestısııalyq strategııanyń qabyldanǵanyn, sonyń arqasynda elimizde kóptegen transulttyq kompanııalar men strategııalyq ınvestorlar tabysty jumys istep jatqanyn aıtty.
Osyǵan oraı, Memleket basshysy Úkimetke shet elderge shyǵarylǵan kapıtaldy elge qaıtarý úshin múmkindik týǵyzý, qazaqstandyq taýarlardy eksporttyq naryqtarda ilgeriletý jóninde sharalar qabyldaýdy, sondaı-aq kásipkerlikti damytýǵa jáne bıznes ortany jaqsartýǵa erekshe mán berýdi tapsyrdy.
Is-shara sońynda Qazaqstan Prezıdenti «Altyn sapa» baıqaýynyń syılyqtaryn tapsyrdy. Atap aıtqanda, «Úzdik ındýstrııalyq joba» syılyǵy – «Giessenhaus» jaýapkershiligi shekteýli seriktestiginiń dırektorlar keńesiniń teń tóraǵasy V.Lıtýevke, «Úzdik ınnovasııalyq joba» syılyǵy – «Recycling Company» jaýapkershiligi shekteýli seristestiginiń joba jetekshisi A.Rıabınınge, «Sapa kóshbasshysy» syılyǵy – «Qazfosfat» jaýapkershiligi shekteýli seriktestigi basqarmasynyń tóraǵasy M.Esenovke, «Úzdik azyq-túlik taýarlaryn jáne/nemese aýyl sharýashylyǵy ónimderin shyǵaratyn kásiporyn» syılyǵy – «Abzal jáne Kompanııa» tolyq seriktestiginiń dırektory M.Eralıevke berildi, «Paryz» baıqaýynyń gran-prı júldesi Evrazııalyq toptyń jetekshisi A.Mashkevıchke tabys etildi. Bıznesti júrgizý jeńildigi jónindegi óńirler men qalalardyń reıtıngi nátıjesi boıynsha arnaıy syılyq Astana qalasynyń ákimi Á.Isekeshevke berildi.
