Shara Mahambet atyndaǵy oblystyq qazaq drama teatrynda oqýshylardyń jetistikterine arnalǵan kórmeden bastaldy. Hımııa, bıologııa, fızıka, matematıka syndy ǵylymdardy ıgerýde arnaıy jobalardy jasaqtap otyrǵan balalardyń jumysy qoıylǵan kórme kópshiliktiń qyzyǵýshylyǵyn týdyrdy. Topyraqty munaı qaldyqtarynan tazartý, jalyndy mıkrotolqyn ádisimen óshirý, arzan elektr kózin alý jáne býdan sý tamshylaryn jınaıtyn qondyrǵylar jasaý sekildi ǵylymı jobalardy mektep oqýshylary daıyndaǵan. Saz jáne qyshtan buıymdar jasaý, toqyma jáne tigin sheberhanasy, aǵash-metall jáne plastık materıaldarmen jumys úıirmesi, beıneleý, kıiz jáne jún ónimderimen aınalysatyn oqýshylardyń týyndylary da kórmeden oryn tapty.
«Uly dala muragerleri» atty oqýshylardyń shyǵarmashylyq esebine arnalǵan gala-konsertte mekteptiń hor ujymy, horeografııa, dombyra, akterlik sheberlik úıirmelerine qatysýshylar óner kórsetti. Quramynda júzden astam oqýshy bar dombyra orkestri bir mezgilde Qurmanǵazy kúılerin oryndasa, mekteptiń kóleńke teatry «Máńgilik el tarıhy» atty qoıylymda elimizdiń negizgi tarıhı oqıǵalaryn kórsetti.
Nazarbaev Zııatkerlik mektepterindegi áleýmettik jobalar, atap aıtsaq «Eki apta aýylda», «Ata-ana jumysynda 10 kún», «Balany jumysqa jetele» syndy oqýshylardyń jazǵy áleýmettik tájirıbeleriniń oryndalýy da kópshilik nazaryna usynyldy.
-Táýelsizdik memlekettegi ár salanyń óz aldyna damyp, ǵalamdyq ózgeristerge beıimdele otyryp qalyptasýyna zor múmkindik berdi. Sonyń biri - ulttyq bilim berý salasy. Memleket basshysynyń qoldaýymen ashylǵan «Nazarbaev Zııatkerlik mektepteri», sóz joq, táýelsizdiktiń jemisi. Sapaly bilim berýdiń otandyq flagmany retinde ózge bilim berý mekemelerin alǵa jeteleıtin, jaratylystaný jáne matematıka baǵytyndaǵy ǵylymdy ıgerýde kósh bastap otyrǵan zııatkerlik mektepter jelisiniń qurylǵanyna 10 jyl tolady. Al Atyraý qalasyndaǵy hımııa-bıologııa baǵytyndaǵy Nazarbaev Zııatkerlik mektebiniń jumysy besinshi jylǵa aıaq basty. Atalǵan merzim ishinde óńirdegi Elbasy mektebiniń jetken jetistikteri, tabysy kóp, - deıdi mektep dırektory Aıdarbek Aıtpýkeshov.
Qazir mektepte 700-den astam oqýshy halyqaralyq standarttar negizinde bilim alyp jatyr. «Barlyq oqýshy tabysty bolatyn mektep!» degen urandy basty ustanymyna aınaldyrǵan bilim ordasy bıyl Nıderlandydaǵy Halyqaralyq mektepter Keńesiniń akkredıtasııasynan sátti ótti.
Baqytgúl BABASh,
«Egemen Qazaqstan»
ATYRAÝ
