Foto: Serik MAIEMEROV
Búgin aımaq basshysy Eraly Toǵjanov «Jetibaı-Jańaózen» avtojolyn qaıta jańartý jumysyna qatysty. Joldyń uzyndyǵy - 73 shaqyrym. Jalpy quny 25 mlrd.teńgeni quraıtyn jobaǵa Azııa Damý Bankisi qarajat bólýde.
«Búgin Jalpyulttyq kópir aıasynda úlken kásiporyndar iske qosyldy. Qazaqstan boıynsha 25 úlken jobanyń ishinde ózderińiz kýá bolǵandaı, «Shetpe-Jetibaı-Aqtaý» joly búgin Elbasyǵa tapsyryldy. Sondyqtan osy nysannyń júzege asyrylýyna atsalysqan barlyq azamattarǵa alǵysymdy aıtamyn. Mine, qazir sol iri jobanyń jalǵasy retinde Jetibaı men Jańaózenniń arasyndaǵy joldyń bastamasyn bastaǵaly turmyz. Bul jáı ǵana bastama emes, bul aldymen adamdardyń qaýipsizdigi. Qazir Aqtaý men Jetibaı, Jetibaı men Shetpe arasyndaǵy avtojolda jol apaty birneshe paıyzǵa deıin tómendegen. Iаǵnı, joldyń sapasy halyqtyń ómirin qamtamasyz etýmen tikeleı baılanysty. Ekinshiden, joldyń boıynda kásipkerler kásibin júrgize alady. Úshinshiden, qanshama azamat jumyspen qamtyldy. Myna qurylys jumystaryna 600 adam tartyldy. Qazaqstannyń tarıhynda alǵash ret Batys Qytaı men Batys Eýropa arasyn jalǵastyrýǵa múmkindik týdy. Sonyń joly ashyldy. Elbasynyń úlken bastamasynyń alǵashqy satysy júzege asty. Qazaqstan - Eýrazııalyq kóliktik-logıstıkalyq habqa aınalatyn kún alys emes qoı dep oılaımyn»,- dedi Eraly Toǵjanov.
Aıta keteıik, 1-ýchaske boıynsha joldyń 35 shaqyrymyna deıin jóndeý jumystaryn «Aq jol qurylys» JShS men «Akkord» AQ júrgizedi, al ári qaraı 2-ýchaske boıynsha 73 shaqyrymǵa deıin «Djengız Inshaat» AF AQ jumys jasaıdy.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy
