Kodeks jobasy salyq jáne bıýdjet saıasatyn jańa ekonomıkalyq jaǵdaılarǵa sáıkestendirýge arnalǵan. Bul Prezıdent N.Nazarbaevtyń «Qazaqstannyń úshinshi jańǵyrýy: jahandyq básekege qabilettilik» Joldaýynda alǵa qoıylǵan mańyzdy mindetteriniń biri bolyp tabylady.
Zań jobasy jeke jáne zańdy tulǵalarǵa qatysty salyq zańnamasyn ońaılatýdy, iskerlik belsendilikti arttyrýdy, salyq ákimshilendirýleri tetikterin jetildirýdi kózdeıdi.
Adal salyq tóleýshi múddelerin qorǵaý maqsatynda normatıvtik-quqyqtyq aktilerdegi túsiniksiz erejeler men dálsizdikterdiń nemese salyq tóleýshiniń salyq organynyń túsindirýi boıynsha áreket etken, keıinnen ózgertilgen qaǵıdanyń saldarynan týyndaǵan daýly máseleler salyq tóleýshilerdiń paıdasyna sheshiletin erejeler engiziledi. Bıznestiń salyq tártibindegi ózgeristerge ýaqytynda daıyndalýy úshin zańdarǵa túzetýler 1 shildeden keshiktirmeı jáne bir zań jobasyna biriktirilip qabyldanatyn bolady.
Mundaǵy jańalyqtar shaǵyn jáne orta bıznes úshin qoldanystaǵy arnaýly salyq tártibin saqtaýǵa, shaǵyn jáne orta bıznes úshin belgilengen alymnyń balama tártibin engizýge, mindetti medısınalyq saqtandyrý jáne mindetti zeınetaqy jarnalaryn engizilýine baılanysty jumys berýshilerdiń salyq aýyrtpalyǵyn tómendetýge baǵyttalǵan. Sharýa qojalyqtaryna arnalǵan salyq ákimshilendirýlerin ońaılatý, sondaı-aq sharýa qojalyqtarynyń basshysy, músheleri men jumysshylaryna áleýmettik salyqty joıý arqyly agrarlyq sektordy yntalandyrý sharalary kózdelip otyr.
Jer qoınaýyn paıdalaný salasynda jer qoınaýyn paıdalanýǵa balama salyqqa ruqsat berý arqyly geologtyq barlaýǵa ınvestısııa ákelý yntalandyrylatyn bolady, jalǵa alý tólemderiniń tetikteri engiziledi, sondaı-aq bir zańdy tulǵa aıasynda basqa óndirý shartyndaǵy nátıjesiz barlaý shyǵyndary esepke alynatyn bolady. Qarjy sektoryn saýyqtyrý úshin qaryzyn keshirgen jaǵdaıda jeke tulǵalardy jeke tabys salyǵynan bosatý jáne jınaqtaýshy saqtandyrý barysynda jeke tabys salyǵyn salý tártibin ózgertý sharalary usynylyp otyr.
Arnaıy ekonomıkalyq aımaqtarǵa salyq salýǵa qatysty jeńildikterdi ulǵaıtý sharttary usynyldy. Kodeks jobasy ınvestısııalyq jobalarǵa qatysty jańa jeńildikterdi belgileıdi, jańǵyrtý men qaıta qurý jónindegi jobalardy júzege asyratyn kásiporyndarǵa korporatıvtik tabys salyǵy boıynsha jeńildikter beredi. Salyq ákimshilendirýleri bóliginde zań jobasy salyq bazasyn álsiretýge qarsy áreket etýge, salyq salý jáne salyqtyq tekserýler tártipterin jetildirýge, salyq qujattaryn sandyq negizge kóshirý men ońaılatýǵa baǵyttalǵan.
Komıtet otyrysynda Salyq jáne bıýdjetke tólenetin basqa da mindetti tólemder týraly» (Salyq kodeksi) kodeksin qoldanysqa engizý týraly» zań jobasy birinshi oqylymda qaraldy.
Qujatta Salyq kodeksiniń kúshine engizý tártibi belgilengen. Zań jobasyna sáıkes Salyq kodeksi 2018 jyldyń 1 qańtarynan bastap qoldanysqa engiziledi, degenmen jeke tabys salyǵyna, esep shot faktýralar men aksızder mólsherlemesine, dıvıdendterge salyq salý men qunynyń ósýine, arnaıy ekonomıkalyq aımaqtarǵa qatysty qujattyń birqatar baptary 2019, 2020 jáne 2020 jyldary jyldary kúshine enedi.
Senatorlar sondaı-aq «Qazaqstan Respýblıkasynyń keıbir zańnamalyq aktilerine salyq salý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda talqylady.
Jańa Salyq kodeksiniń erejelerin iske asyrýǵa baılanysty Azamattyq (Jalpy bólim), Kásipkerlik, Bıýdjet kodeksterine jáne Ákimshilik quqyq buzýshylyq týraly kodekske jáne birqatar zańdarǵa ózgerister engiziledi. Jańartylǵan zań erejeleri jeke kásipkerlerdi tirkeýge, kásipkerlik sýbektileriniń jeke baǵalary men tarıfterin memlekettik retteýge, ınvestısııalyq preferensııalar men sýbsıdııalar belgileýge, arnaıy ekonomıkalyq aımaqtarǵa qatysýshylardy salyqpen yntalandyrýǵa, eńbekke aqy tóleý qoryna aýyrtpalyqty azaıtýǵa, sondaı-aq salyq tártibin nyǵaıtýǵa baǵyttalǵan salyqtyq ákimshilendirýdi jetildirýge de qatysty.
