Taıaýda Búkilreseılik qoǵamdyq pikirdi zertteý ortalyǵy eldegi turǵyndardyń TMD-ǵa múshe memleketter men olardyń basshylary jónindegi kózqarasyna saraptama jasaǵan eken. Ortalyq taratqan derekterge súıensek, keıingi kezderi múshe memleketterge halyqtyń oń pikiri qalyptasqan. Ásirese saýalnamaǵa qatysqan reseılikter Belarýs pen Qazaqstandy basqalarǵa qaraǵanda senimdi seriktes retinde esepteıtinin jetkizgen.
Ortalyqtyń ókili Elena Mıhaılovanyń aıtýynsha, Belarýs pen Qazaqstan jónindegi jyly pikir qalyptasýyna eki eldiń Kedendik odaq pen Eýrazııalyq ekonomıkalyq odaqtyń negizin quraýy sebep bolǵan. Saýalnamaǵa qatysqandardyń 60 paıyzy Belarýsti, 41 paıyzy Qazaqstandy «eń turaqty ári tabysty» memleket sanatyna qosqan. E.Mıhaılova Reseı turǵyndary halyqaralyq arenada da Qazaqstan men Belarýsti Reseıdiń senimdi seriktesi dep sanaıtynyn aıtady. Sondaı-aq saýalnamada TMD-ǵa múshe memleketterdiń basshylary týraly da suraq qoıylǵan eken. Oǵan qatysqandardyń basym bóligi Elbasy Nursultan Nazarbaevtyń halyqtyń senimine ıe ekenin ataǵan.
Halyqaralyq qatynastar jónindegi Máskeý memlekettik ınstıtýtynyń Ortalyq Azııa men Aýǵanstandaǵy máselelerdi zertteý ortalyǵynyń dırektory Andreı Kazansev saýalnamanyń nátıjesi reseılikterdiń TMD-ǵa múshe memleketterge jalpy kózqarasyn bildirgenimen, keıbir jaǵdaılarda kelispeıtin máseleler bar ekenin aıtady.
«Reseılikterdiń kórshi elderge qandaı turǵydan qaraıtynyn eskerý kerek. Buǵan áleýmettik-mádenı jaǵdaı men slavıan biregeıligi sekildi faktorlar áser etedi. Sonyń nátıjesinde, saýalnamada Belarýs Qazaqstanǵa qaraǵanda tabysty memleket bolyp kóringen. Alaıda bul shyndyqtan alshaq jatyr. IJО́-niń tıimdiligi jóninen Qazaqstan ǵana Reseımen básekelese alady. Qazaqstan TMD boıynsha Reseıdiń qarjylyq qoldaýyn qajet etpeıtin birden-bir memleket», deıdi A.Kazansev.
Mundaı pikirdi jergilikti máseleler jónindegi ortalyqtyń dırektory Dmıtrıı Jýravlev te bildirdi. Onyń aıtýynsha, halyqtyń senimi boıynsha A.Lýkashenkonyń top bastaýyna reseılikterdiń Belarýs tarıhyn jaqsy bilýi negiz bolǵan. «Alaıda Omby men Chelıabi sekildi turmysy Qazaqstanmen tyǵyz baılanysty oblystarda saýalnama júrgizgende, saýalnamanyń nátıjesi basqasha bolatyny sózsiz. Osy oraıda, Qazaqstan men Reseı arasyndaǵy bilim berý baılanysynyń mańyzdylyǵyn atap ótkim keledi», dedi D.Jýravlev.
Reseılik sarapshylar men halyqtyń Qazaqstan týraly oń pikir bildirýi beker emes. Reseı – Qazaqstannyń eń úlken saýda seriktesi. Máselen, 2015 jyly eki el arasyndaǵy saýda aınalymy 14,6 mıllıard dollarǵa jetken.
Abaı ASANKELDIULY,
«Egemen Qazaqstan»
