«Sırııadaǵy IGIL tobynyń músheleri jermen-jeksen boldy. Al aýmaq tolyǵymen ekstremısterden tazartyldy. Birer saǵat buryn Reseı qorǵanys mınıstri Sergeı Shoıgý osy týraly joǵarǵy bas qolbasshy, prezıdent Vladımır Pýtınge baıandady», – dedi Valerıı Gerasımov.
Onyń aıtýynsha sársenbi kúni, ıaǵnı 6 jeltoqsan kúni Sırııa áskeri Deı-áz-Zor provınsııasynda IGIL-diń qalǵan músheleriniń kózin joıǵan. «Osylaısha, qazirgi ýaqytta Sırııa jerinde IGIL ıelik etip otyrǵan eshqandaı aımaq joq», – dep qosty Gerasımov.
Kóp uzamaı Kreml saıtynda Sergeı Shoıgýdyń Vladımır Pýtınge baıandama jasaǵany habarlandy. «Eki saǵat buryn qorǵanys mınıstri Evfrattyń shyǵys jáne batys jaǵalaýlaryndaǵy ekstremıster tolyǵymen joıylǵanyn habarlady», – dedi Pýtın jýrnalısterge bergen pikirinde.
5 jeltoqsanda Reseı qorǵanys mınıstri Sırııa úkimetiniń áskeri atalǵan top sodyrlarynyń qalǵan bóligin joıýǵa kiriskenin habarlaǵan bolatyn.
Aıta keteıik, qarasha aıynda Reseı bıligi jyl sońyna deıin Sırııadaǵy Reseı operasııasy sátti aıaqtalýy tıis ekenin jetkizgen. Al basty maqsat – IGIL múshelerin tolyqtaı jeńý. Naqtyraq aıta keteıik, 20 qarasha kúni Sochıde Pýtın men Sırııa prezıdenti Bashar Asad kezdesýinde operasııa jumystaryn tezirek aıaqtaý týraly kelisilgen bolatyn. «Negizgi maqsat qazirdiń ózinde aıaqtalýǵa jaqyn qaldy. Sondyqtan taıaý arada bul máseleni sheshýimiz múmkin», – degen edi sol kezdesýde Vladımır Pýtın.
Al 21 qarasha kúni Sochıde Pýtın Iran men Túrkııa elderiniń prezıdentterimen kezdesip, Sırııadaǵy máseleni talqylady. Osy kezdesýde Pýtın Sırııa úkimetiniń áskeri eldiń 98% aýmaǵyn óz baqylaýyna alǵanyn alǵa tartqan. «Lańkester áli de qarsylyq tanytýy múmkin, alaıda bizdiń áskerı-ǵarysh kúshterimizdiń soqqylaryna tótep bere almaıdy», – dedi.
Arada eki kún ótkennen keıin Valerıı Gerasımov tilshilerge bergen suhbatynda Sırııadaǵy Reseı áskeri azaıýy múmkin ekendigin aıtqan. Al Reseıdiń qaýipsizdik keńesiniń hatshysy Nıkolaı Patrýshev 30 qarasha kúni Sırııadaǵy reseılik kontıngentti azaıtý jumysy bastalyp ketkenin málimdedi.
Sarapshylar Pýtınniń Sırııadaǵy operasııa jumystaryn prezıdenttik saılaý aldyndaǵy naýqan bastalǵanǵa deıin aıaqtaıdy dep kútken. Eske sala keteıik, keshe, ıaǵnı 6 jeltoqsanda Pýtın GAZ zaýytynyń 85-jyldyǵyna arnalǵan jıynda saılaýǵa túsetinin habarlady.
Reseı Sırııa jerinde eki jyldan astam ýaqyt shaıqasyp keledi.
Daıyndaǵan Aıan ÁBDÝÁLI, «Egemen Qazaqstan»
