«Osydan 8 jyl buryn ınternet jelisine qosylǵan qurylǵylardyń sany ǵalamtordy paıdalana alatyn adamdardyń sanymen teń edi. Fýtýrologtardyń boljaýynsha, 2030 jylǵa qaraı zattar ınternetiniń ınfraqurylymy 1 trln-dy qurasa, mobıldi qosymshanyń sany 100 mln-ǵa jetýi múmkin. Mackenzie sarapshylary zattar ınternetiniń jalpylasýy 2025 jylǵa qaraı jahandyq ekonomıkaǵa 11 trln. dollar úles qosady dep otyr. Zattar ınternetine álemniń barlyq eli umtylýda. Ásirese Sıngapýr, Qytaı, Danııa, Ońtústik Koreıa sııaqty memleketter bul baǵytta ózgelerge qaraǵanda óte jyldam ilgerilep keledi. Biz de olardan qalyp qoımaýymyz kerek», degen Dáýren Abaev elimizde ınfraqurylymdy, adamı kapıtaldy, memlekettik qyzmetterdi damytý men ınnovasııalyq ekojúıeni jáne ekonomıka salasyn sıfrlandyrýdy kózdegen «Sıfrlyq Qazaqstan» memlekettik baǵdarlasy sol úshin júzege asyp jatqanyn jetkizdi.
Keshe ǵana Indýstrııalandyrý kúninde Memleket basshysy sıfrlandyrýdyń mánin, tıimdiligin jáne oǵan jetýdiń joldaryn eń aldymen qoǵam túsinýi kerek ekenin atap ótti. Aqparat jáne kommýnıkasııalar mınıstri osy maqsatqa jetý úshin eń joǵary saıası deńgeıde Qazaqstandy sırfrlandyrýǵa nıetti bolǵanda ǵana ekonomıkaǵa orasan paıda ákelýge múmkindik bar ekenin aıtty.
«Biz «Sıfrlyq Qazaqstan» memlekettik baǵdarlamasy arqyly aıtarlyqtaı ekonomıkalyq ósimge qol jetkizemiz dep úmittenemin. Memleket basshysy osy baǵdarlama arqyly bizdiń aldymyzǵa keleshegi zor maqsat qoıdy. Munyń barlyǵynan bólek ekonomıkalyq tıimdilik te mindetti túrde qajet. Biz soǵan umtylamyz», dedi D.Abaev.
QR Aqparat jáne kommýnıkasııalar mınıstrliginiń qoldaýymen «Qazaqtelekom» aksıonerlik qoǵamy ótkizgen «IoT Forum Astana 2017» forýmynda zattar ınternetin (Internet of Things) engizýdiń ózekti máseleleri, ony qazaqstandyq jáne jahandyq aýqymda qoldaný perspektıvalary talqylanady.
Aıta keteıik, zattar ınterneti degenimiz aqparat jınaýǵa jáne almasýǵa múmkindik beretin elektronıkamen, arnaıy baǵdarlamamen, sensorlarmen jáne ınternetke shyǵý múmkindigimen jabdyqtalǵan fızıkalyq obektilerdiń jelisi. Oǵan uıaly telefon, kofeqaınatqysh, kir jýǵysh mashına, kólik, muzdatqysh sııaqty kóptegen zattardy jatqyzýǵa bolady.
Maıgúl SULTAN,
«Egemen Qazaqstan»
