Oıyn bastalmas buryn «Slavııanyń» quramyna qarap uzaq otyrdym. Bylaı qarasańyz, fýtbolshylarynyń quramy kádimgideı tisqaqqandardan quralǵan. Iаn Lashtývka «Shahter» (Donesk) komandasynyń negizgi qaqpashysy bolǵan. Mıgel Dannı da «Zenıt» sapynda jarqyldap, Sýperkýboktyń fınalynda «Manchester Iýnaıted» qaqpasyna gol soqqan. Sondyqtan portýgalııalyqty tanystyryp jatýdyń ózi beker. 2012 jyly «eń ádemi goldy» kim soqqanyn biletin shyǵarsyzdar? Sol shaqta «Fenerbahcheniń» oıynshysy bolǵan Mıroslav Stoh qazir «Slavııanyń» sapynda.
Osydan eki jyl buryn Qazaqstan ulttyq quramasymen birge Plzendegi Chehııa-Qazaqstan oıynyna barǵan edim. Ol match ta qazir kóz aldymda. 75-mınýtqa deıin jeńip turdyq. Alańǵa almasyp kirip, 2 gol salyp, salymyzdy sýǵa ketirgen Mılan Shkoda «Slavııanyń» bir atary. 2004 jyly Qazaqstan quramasy ÝEFA jalaýynyń astynda alǵashqy oıynyn Ýkraınaǵa qarsy ótkizdi emes pe? Iá, dál sol tarıhı matchta biz sońǵy sekýndta gol jiberip, teń nátıjeden aıyrylyp qaldyq. Goldy Rýslan Rotan soqty. Tomash Nesıdtiń sheberligine de shek keltirmeımiz. Al Halıl Altyntop 2010 jyly Sıdelnıkovtiń qaqpasyna ǵalamat gol soqqan Hamıt Altyntoptyń syńary ǵoı.
Jalpy, qarap otyrsaq, barlyǵy tájirıbıeli, ózderiniń sporttyq ǵumyrlarynda joǵary nátıjelerge qol jetkizgen aıaqdopshylar.
1-taım. Kezdesý bastalysymen qos komanda birden shabýyl jasaýǵa asyqpady. Ekeýi de emin-erkin pas almasyp, ózderiniń kishigirim daıyndaǵan qıturqy kombınasııalaryn iske asyryp kórgisi keldi. Alaıda sondaı bir ǵalamat shabýyldardy kóre almadyq. Oıynnyń 25-mınýtyna qaraı bizdiń qaqpamyzdyń aldynda buryshtamalar kóbeıip, qaýipti sátter paıda bola bastady. «Slavııa» qaqpashysy Iаn Lashtývka tońǵannan bolar, dene qyzdyryp, árli-berli júgirip júrdi.
Al 38-mınýttan bastap shabýylǵa shyǵa bastaǵan elordalyqtar standartty jaǵdaı oryndaýǵa múmkindik aldy. Aıyp alańyna kóterilgen pas baıqaýsyzda Marın Anıchıchtiń aldyna kele qaldy. Qorǵaýshymyz bos qaqpaǵa gol soqty. Alaıda qaptaldaǵy tóreshi ofsaıd jaǵdaıy bolǵandyǵyn kórsetti. Degenmen, bas tóreshi Anıchıchke doptyń Tomash Nesıdke tıip kelgenin anyq kóripti. Aqyldasa kele, salynǵan goldyń ádil bolǵanyn bildirtti. Tablodaǵy kórsetkish – 0:1.
2-taım. Ekinshi taım bastalysymen «Slavııa» shabýylǵa shyqty. Al qazaqstandyqtar qorǵanysqa basa kóńil bólip, aragidik qarymta shabýyldarǵa ıek artyp otyrdy. 78-mınýtqa deıin qaqpashymyz Nenad Erıch ýaqyt sozǵandyqtan, sary qaǵaz aldy. Odan ári qaptaǵan buryshtamalar degbirimizdi qashyrdy. Qorǵaýshylarymyz shabýyldardy biriniń artynan birin qaıtaryp jatty.
Ortada júrgen Serikjan Mujyqovtyń ornyna Stanımır Stoılov qorǵaýshy Sergeı Malyıdy shyǵardy. Boıy uzyn ortalyq qorǵaýshy komandaǵa aýadaı qajet edi. Alań jıeginde Stoılovtyń kómekshisi Grıgorıı Babaıan 80-mınýttan bastap baıyz taýyp otyra almady. Aıaqtan tik turyp, shákirtterine aqyl-keńes aıtýmen boldy. Júıkeni tozdyrǵan sońǵy 10 mınýt ǵasyrdan da uzaqqa sozylǵandaı kórindi.
Tóreshiniń sońǵy ysqyryǵy qazaqstandyq klýbty pleı-off satysyna alyp shyqty. Qazaqstan fýtbolynyń tarıhyna enetin bul oıyndy trıbýnada tolqyp otyryp kórgen mende de arman joq, qazaq fýtbolynyń jankúıerlerinde de arman joq. Alǵa, «Astana», alǵa Qazaqstan!
Ermuhamed MÁÝLEN,
«Egemen Qazaqstan»
