Asan Qaıǵy babamyz Jeruıyq izdep, Jelmaıasymen jortyp júrip Jýaly jerin kórgende «Shóbiń semiz, qaryń mol, topyraǵyń maı eken, qadirińdi egin salǵan el biler. Basqanyń bárin qısań da, Jýalyny qımaısyń, óńgerip alyp keter em, at saýyryna syımaısyń» dep tamsanypty desedi. Sonymen qatar kezinde Batys pen Shyǵysty baılanystyryp, Áýlıeata jolymen júrip ótken kerýenniń Jýaly jerine aıaldaǵany týraly da derekter bar. Budan keıin, búginde aýdannyń irgesinen qazylyp jatqan kóne qalashyqtyń orny da bul jerdiń ejelden beri tarıhı ólke ekenin dáleldeı túsedi.
Aýdan ákimi Baqtııar Kópbosynovtyń bastamasymen osy jerden tarıhı derekter negizinde shógip jatqan túıeniń músini turǵyzylýda. Bıik tóbege jol boıynan turǵyzylyp jatqan Oısylqara túliginiń kelbeti jolaýshylardy tańdandyrmaı qoımaıdy. Al muny jergilikti jurt «dala kemesi» dep ataıdy. Sebebi bıik tóbeniń basyna ornatylǵan shókken túıeniń músinin jan-jaǵynan sý qorshap tur. Sonda syrt kózge bir qaraǵan adamǵa bul jer kishigirim aral sııaqty da, shókken túıe alyp keme sııaqty áser beredi.
Alyp músindi Áýlıeata óńirine belgili músinshi-sýretshi Qoıshybaı, Baýyrjan jáne Perdeǵalı Tóremuratovtar somdap jatyr. Áýeli músinshiler músinniń nobaıyn syzyp alǵan soń ony somdaýǵa kirisken. Odan keıin tuǵyryn tas, armatýramen shatpaqtap, betonmen myqtap bekitipti. Sol tuǵyrǵa jýan-jińishke aralas symdarmen shabaqtalǵan, bıiktigi 5 metr, uzyndyǵy 10 metr bolatyn alyp túıeniń shógip jatqan sulbasy qondyrylǵan. Bul sharýaǵa Iýrıı jáne Valerıı esimdi dánekershi jigitter kómek beripti. «Músin kópshilikke tastan qalanyp jasalǵandaı áser berýi kerek. Sondyqtan biz onyń pishinin jumyr etip somdaýǵa tıispiz. Bul jumys tolyq aıaqtalǵan soń, alyp músindi boıaý jumystaryna kirisemiz» deıdi bul jumysqa basshylyq jasap, ózi de sol jumystyń bel ortasynda júrgen №1 aýdandyq balalar óner mektebiniń dırektory Qanat Murataev.
Bul músinniń taǵy bir keremeti bar bolyp shyqty. Bolashaqta músinniń ishinen kórme bólmesin jasaqtaý oıda bar eken. Tipti bul maqsatta eskertkishtiń bir buryshynan esik te jasalyp qoıǵan. Endi ári-beri ótken jolaýshylar úshin shókken túıe menmundalap turatyn bolady.
Hamıt ESAMAN,
«Egemen Qazaqstan»
Jambyl oblysy
