Indýstrııalandyrý kartasy aıasynda Mańǵystaý oblysy ákimdigi, «QazMunaıGaz» UK jáne «QazTransGazAımaq» AQ arasyndaǵy úsh jaqty memorandýmǵa sáıkes, Shetpe aýylyna qýattylyǵy saǵatyna – 20 000 m3 gaz jetkizetin «Okarem – Beıneý» magıstraldy gaz qubyrynan Shetpe aýylyna deıin 90 shaqyrym qashyqtyqtan tartylǵan gaz qubyry iske qosyldy. Jobanyń quny 5,7 mlrd teńgeni quraıdy.
- Sizderdi táýelsizdik kúnimen quttyqtaımyn! Qanshama qıyn kezeńder basymyzdan ótti. 90 jyldary qalaı bolyp edi?. Qazaqstan táýelsizdigin nyǵaıta bildi. Iri jobalardy júzege asyryp, álemdik arenada óz orny bar memleketke aınaldy. Elbasynyń salıqaly saıasatynyń arqasynda elimizdiń shekarasy nyq bekidi. Turaqtylyq bolǵan jerde áleýmettik suraq ta, ekonomıkalyq suraq ta sheshiledi dep oılaımyn. Myna úlken jobanyń júzege asyrylýy da táýelsizdiktiń jemisi. Mańǵystaý aýdany tolyqtaı gazben qamtyldy. Endi taǵy da oblystyń 5 aýdanynda jáne Jańaózen qalasynda jalpy uzyndyǵy 1370 shaqyrymdy quraıtyn gaz qubyryn tartý jumystary júrgizilip jatyr. Jobany iske asyrýǵa 800 adam jumysqa tartyldy. Nysan paıdalanýǵa berilgen soń 100 adam turaqty jumyspen qamtylady, - dedi Avtomattandyrylǵan gaz taratý stansııasyn (AGRS) ornatý jumysynyń saltanatty ashylýyna qatysqan aımaq basshysy Eraly Toǵjanov.
Mereke qarsańynda aýyl turǵyndaryna tartý retinde esik ashqan taǵy bir nysan Shetpe selosyndaǵy 50 oryndyq «Darhan» balabaqshasy. Jergilikti kásipkerdiń óz qarajatymen salynǵan bóbekjaı qurylysyna 40 mln. teńge jumsalypty.
«Shaǵyn jáne orta bıznesti damytý – HHI ǵasyrdaǵy Qazaqstannyń ındýstrııaldy jáne áleýmettik jańǵyrýynyń negizgi quraly» - dep Elbasymyz atap ótkendeı, qaı kezde de shaǵyn jáne orta kásipkerlikti damytý memleket saıasatynyń basty baǵyttarynyń biri bolyp qala bermek. Shaǵyn jáne orta bıznesti belsendi qoldaý baǵytyndaǵy jumystar jalǵasyn taýyp, aýdan tarıhynda alǵash ret Shetpe aýylynan buqtyrylǵan et konservisin shyǵaratyn seh zaýyty ashyldy. Kásiporyn táýligine 700 -1000 dana mal etinen buqtyrylǵan konservi daıyndaıdy. Sharýa ıesi «Atameken» UKP arqyly 10 mln teńge shaǵyn nesıe alyp jáne óz qarajaty arqyly sehty ashyp otyr.
- Bul seh tek oblys emes, elimizdiń basqa aýmaqtaryn da sapaly ónimimen qamtamasyz etetindigine senim mol. Aıyna 10 myń dana konservi shyǵaryp, 15-20 adamdy jumyspen qamtıtyn bul sehtyń bolashaǵy zor bolary sózsiz. Endeshe kásiporynnyń jumysyna tabys tilep, budan da basqa ónimder shyǵarýyna, óńir ekonomıkasynyń damýyna úles qosatyn kásipkerlik nysany bolýyna tilektespin, - dedi oblys ákimi.
Saltanatty rásimnen keıin Eraly Toǵjanov aýyl aqsaqaldarymen kezdesip, oblystyń áleýmettik damýyn sóz etti. Aımaqta júzege asyrylǵan mańyzdy strategııalyq jobalardy talqylap, ekonomıkalyq kórsetkishterdi aıtyp berdi. Al, aqsaqaldar qaýymy óz rızashylyqtaryn bildirip, jyly lebizderin jetkizdi.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
